Higpit nga screening sa tour guides himuon
Nanawagan ang Provincial Tourism Office sa lokal nga kagamhanan sa lungsod sa Badian nga mohimo og mas kuti nga screening sa mga local tour guide sa ilang lungsod.
Kini human nga laing duha ka mga canyoonering guides ang nadakpan sa buy-bust operation sa kapulisan niadtong Biyernes.
Matod ni Provincial Tourism officer Boboi Costas, ang mga i-accredit nga tour guide kinahanglang nga wa malambigit sa bisan unsang bisyo ug dunay igong pagtagad sa panlawas niini ug sa kaluwasan sa mga turista.
Ang mga nasikop mao silang Jejomar Divinagracia, lumad nga taga Alegria ug James Peter Greeves, taga Brgy. Matutinao, Badian.
Giklaro hinuon sa Badian police nga parehong di accredited canyoneering guide sa lungsod ang duha.
Di kini unang higayon nga may mga tour guide sa Badian nga nalambigit sa ilegal nga drugas.
Gani sa uwahing drug test nga gihimo sa Cebu Provincial Anti-Drug Abuse Office, dunay unom nga nagpositibo sa paggamit og drugas.