MILILI NI DUMPIT IMBESTIGAHON
Adunay listahan ang Police Regional Office 7 sa mga pulis nga milili sa haya ni anhing SPO1 Adonis Dumpit nga gipaubos na sa background investigation human makuhaig hulagway sud sa punerarya diin gihaya ang
kontrobersyal nga pulis.
Matod ni P/CSupt. Debold Sinas nga ang background investigation sa mga pulis nga nakuhaan og hulagway nga mibisita sa haya ni Dumpit internal lamang kini diin sila lang ang nasayod kun si kinsa ang mga pulis.
Dugang ni Sinas nga sapagkakaron mga buotan pa nga mga pulis ang ilang napaubos sa background investigation ug wa malambigit sa ilegal nga kalihukan.
Usa sa ilang sutaon ang posibling kakunsabo ni Dumpit sa iyang ilegal nga kalihukan nga
misimpatiya sa kamatayon niini.
“Yes we're checking sa ilaha but wala pa namang derog kaayo, ang amoa lang kasi kung ang uban ato unsay association nila at ano ang interest nila, tandaan mo that is a very bad example of
being a policeman,” matod Sinas. Iyang gipasabot nga ang tumong ug tuyo sa pagpaubos sa
background investigation mao ang counter intelligence lang aron pagsubay sa posibling linya ni Dumpit sa iyang illegal nga kalihukan sa siyudad sa Sugbo.
Atol hinuon sa paglubong wa nay nabantayan nga mga police personnel nga suod nga higala sa napatay nga pulis nga mihatod sa lubnganan.
Gipasabot hinuon sa heneral nga di sila mo imbestigar sa mga sibilyan nga una nang gibutyag ni Mayor Tomas Osmeña nga andam siya nga mopaubos sa background investigation.
Samtang wa gihapoy madawat nga benepisyo ang pamilya ni Dumpit gawas lang sa mga wa magamit niini nga leave credits.
Matod ni P/SSupt. Angeles Genorga, hepe sa Bohol Provincial Police Office, nga ang ilang buhatan mihikay na sa mga papeles aron mahatag kini sa labing dali nga panahon sa iyang bugtong anak lalake.