Mga pulitiko kuhaan og police escorts
Nunot niining mga pagpamatay sa mga local officials labi na ang mga nahilambigit sa kalihukan sa illegal sa drugas, daghang mga mayor ang na-alarma. Ug gumikan niini gusto nilang palig-unon ang ilang mga security escorts pinaagi sa paghangyo sa Philippine National Police (PNP) nga dunganan ang ilang mga escorts. Apan si Presidente Rodrigo Duterte mimando ngadto sa PNP nga limitahan lamang ang police escorts sa mga local official ngadto sa duha.
Ang tumong sa Presidente aron dili mo-abuso ang mga pulitiko pinaagi sa paghimo sa ilang mga escorts ngadto sa mga goons. Daghan tuod nga mo-abuso gumikan kay naa silay mga escorts. Unya kining maong mga escorts mao may mopakita og gilas ngadto sa ilang amo. Mangulata ug manion og armas sa mga gika-atraso sa ilang amo. Usahay mao gyud mopusil o mopatay.
Ang “kanhi laos nga pulitiko” miangkon nga aduna siyay duha ka mga security escorts ug matod pa niya nga andam niyang ipa-recall sa PNP ang iyang duha ka escorts kon gikinahanglan alang sa pagpatunhay sa kahapsay ug kalinaw sa dakbayan. Wow! Mora man pod siya og nag-drama. “Amards” (drama) ra kaayo, matod pa nila.
Aw, kon dili na siya gusto og bodyguards o police escorts, iya pod na. Pero para nako, okey ra man nang duha ba, on shifting basis. Privilege man usab na sa mga local chief executives. Pero kon wala kay gikahadlukan ug limpyo ang imong konsensiya ug wala kay kaaway, nganong magtinir man ka og bodyguards? Naay bitaw uban diha wala may bodyguards. Sama nila ni Kong. Raul del Mar ug Bebot Abellanosa.
Pero kanang escorts dili na garantiya nga ma-protektahan kana sa imong seguridad. Daghang paagi sa pagpatay. Naa bitaw mga presidente ug primero ministro sa ubang kanasuran napatay man lagi pinaagi sa assassins bisan daghan og escorts. Kon gusto sa Ginuo nga kuhaon ka, walay makapugong bisan usa ka batalyon pang imong security.
Kanang mga pulis nga naa madestino sa mga negosyante mao nay unahon sa pag-recall. Mga datu na sila ug maka-afford nga maka-hire og private escorts. Nganong hatagan man sa kagamhanan?