CAMOTES GIAGAK NI KENNY ROGERS
Daw mibirit sa pag-awit si Kenny Rogers Rocacurva sa iyang pagmugna og 33 puntos aron agakon ang San Francisco sa 84-68 nga kadaugan batok sa Consolacion Sarok Weavers nga naghatag kanila og 1-0 nga bintaha sa North division finals best-of-three series sa San Francisco Gym sa isla sa Camotes.
Si Rocacurva, kansang pangalan sangay sa sikat nga mag-aawit sa Amerika nga si Kenny Rogers, nidugang sab og 14 rebounds, lima ka steals ug duha ka assists nga maoy naghatag og dakong problema sa Sarok Weavers.
Ang magduduwa sa Cebu Institute of Technology University (CITU) Wildcats nimugna og 24 puntos sa 2nd half lakip na niini ang duha ka sunodsunod nga three-point shots nga naghatag sa San Francisco sa labing dakong labaw niini, 7053, sa nahabiling kapin sa 6:00 ka mga minutos.
Giangkon ni Rocacurva nga grabeng pressure ang iyang gibati apan wala siya nagpaapekto niini hilabi na kay naanad na siya sa pagduwa sa korte nga gikombatihan.
Si San Francisco coach Christian Liaz malipayon nga ning kombatiha, nakadawat si Rocacurva og saktong suporta gikan sa iyang mga kauban hilabi na nila ni Wilson Pleños Jr. ug Jake Laurence Gonzales.
Si Pleños nitampo og 16 puntos samtang niamot og 12 puntos si Gonzales.
Nidugang si Liaz nga nakatabang sab og dako ang grabeng abiba sa mga taga San Francisco nga midugok bisan sa dili maayong panahon. Ang Consolacion, nga maoy defending North champions, gipangulohan ni Patrick Montaño pinaagi sa iyang 24 puntos ug 14 rebounds samtang nitunol og 20 puntos ug 12 rebounds si Emmanuel Villamor.
Ang Game 2 sa series duwaon ugma sa balwarte sa Consolacion.