WALA’Y IMPORT, WA’Y PROBLEMA
Mga duwa karon 5:15 pm- UV batok USPF (jrs) 6:45 pm- UV batok UC (srs)
Bisa’g wala sila’y import, ang University of the Visayas (UV) Green Lancers masaligon gihapon nga ilang malangkat ang titulo sa college division sa ilang pagpakigbatok og balik sa M.Lhuillier-University of Cebu (UC) Webmasters karong gabii sa Game 2 sa best-of-three finals sa Cebu Schools Athletic Foundation Inc. (CESAFI) 2018 Partner’s Cup Pre-Season sa Cebu Coliseum.
Sa Game 1, naangol ang tuo nga tuhod sa import sa Green Lancers nga si 6’8” Lassina Coulibally sa ulahing bahin sa 1st quarter apan nakamaneho gihapon kini paglampornas sa Webmasters ni coach Raul “Yayoy” Alcoseba, 78-60.
Nagkanayon si Green Lancers coach Gary Cortes nga ning kombatiha, dili makaduwa si Coulibally gumikan kay grabe ang pagkaangol niini ug posiblenbg dili na kini makabalik og duwa hasta na sa regular season.
“Na-dislocate gyud. Suwayan lang ni namo nga mochampion nga wala’y import kay dili na man ta puwede makailis. Positive ra man hinuon gihapon ang akong players
nga mo-champion gyud mi,” matod ni Cortes.
Sa Game 1, napamatud-an sa Green Lancers nga kaya nilang mobarog bisan wala’y import.
Gikan sa pagkaangol ni Coulibally, ang Green Lancers ningmugna og 14-0 run sa pagpangulo nila ni Josue Segumpan ug Sheldon Gahi aron pagposte og 42-20 nga labaw.
Ning-aksyon paggukod ang Webmasters ug ilang napahak ang labaw sa Green Lancers ngadto na lang sa 11 puntos, 48-59, sa sayong bahin sa 4th quarter.
Apan ningbulhot na sab ang opensa sa Green Lancers ug ning higayuna mideretso na kini paingon sa 18 puntos nga kadaugan. Gipangulohan ni Segumpan ang kadaugan pinaagi sa iyang 22 puntos, nidugang og 14 puntos si Gahi samtang niamot og 10 puntos si Gileant Delator.
Ang Webmasters gipangulohan ni Justine Dacalos pinaagi sa iyang 19 puntos samtang niamot og 15 puntos si John Jabello.
Ang import sa Webmasters nga si Frederick Elombi wala nakaarti og insakto gumikan sa depensa sa Green Lancers ug igo lang kining nakamugna og lima ka mga puntos.
Gilauman nbga ning sangkaa, adunay adjustments nga himuon ang Webmasters hilabi nga nakuhaan og lig-on haligi sa ilawom ang Green Lancers.
Sa premirong duwa, ang UV Baby Green Lancers mosuway sab paglangkat sa titulo sa high school division sa ilang pagpakigbatok og balik sa University of Southern Philippines Foundation (USPF) Baby Panthers sa Game 2 sa ilang finals series.
Ang Baby Green Lancers ningmakmak sa Baby Panthers, 68-59, sa Game 1 ug tatawng nakahatag kini kanila og dugang pagsalig paingon ning sangkaa.
Dili angayang molugak bisan gamay ang Baby Green Lancers ug angayan nilang hinuktokan nga gipukan sila sa Baby Panthers, 78-73, sa ilang panagsangka sa elimination round niadtong Hunyo 9. Sa laing bahin, naangkon sa Casino Active-University of San Jose-Recoletos Baby Jaguars ang ikatulong dapit sa high school division pinaagi sa pagbuntog sa Hotel Fortuna-UC Baby Webmasters, 8173, sa miaging gabii.
Samtang nasakmit sa USPF Panthers ang ikatulong dapit sa college category pinaagi sa pagbuntog sa USJ-R Jaguars, 65-64.