ARSOBISPO GI-TARGET?
ARMADONG LALAKE GIPUSILPATAY SA PULIS SA ARCHBISHOP’S COMP OUND, NANGITA SA ARSOBISPO
Usa ka armadong lalake nga nangita kang Cebu Archbishop Jose Palma, gipusil-patay sa kapulisan nga nitubag sa armed person alarm sa compound sa Archbishop Palace sa dalan d. D Jakosalem, dakbayan sa Sugbo, alas 11:00 sa buntag kagahapon.
Sumala sa kapulisan, ang maong lalake nga nailhan pinaagi sa iyang indentification card ug uban papeles nga si Jeffrey Gonzales Cañedo, 41, nga taga Barangay Labangon, Cebu City, nisulod sa buhatan sa Arsobispo apan nilakaw human nasayod nga wala si Palma nga nitambong og ordinasyon sa Koronadal, South Cotabato.
Apan giingong nakamatikod ang staff, lakip sila si Monsignor Joseph Tan ug Auxiliary Bishop Dennis Villarojo nga diha sa sulod, nga duna kini dala nga armas busa nitawag sila og panabang sa kapulisan. Dali usab nakatubag ang pulis sa alarma ug naabtan ang lalake sa parking area duol sa iyang motorsiklo.
Ang Mobile Patrol Group Car 002 nga giluwanan ni PO1 Sheila May Estremo ug lain pang kaubanan mimando nga itaas ang mga kamot ni Cañedo apan giingong nibunot na hinuon kini ug dayong pamusil.
“Pag-abot namo sa gate among gipangutana asa ang tawo, ingon sila nga naa sa sulod. Among naabtan diri kadtong caretaker nya nitudlo siya adtong lalake nga naa sa motor. Mao tong among giingnan nga isaka ang kamot. Giusab pa namo pag-ingon nga isaka ang kamot. Mibunot man siya nya namusil mao tong among gibawsan,” matod ni Estremo.
Katorse ka mga bala ang nakuha sa scene of crime operatives (Soco) diin tulo niini iya sa kalibre M16 samtang ang uban sa kalibre 9mm. Nalakip sa ilang nakuha ang usa ka kalibre .38 nga paltik nga aduna pay nag-ungot nga bala ug usa ka jungle knife.
PROBLEMA SA PAMILYA
Nipatim-aw sa CCPO ang amahan ni Cañedo nga usa ka retiradong pulis nga si Police Insp. Feliciano Cañedo, taga Agustina Village, Barangay Tungkil, lungsod sa Minglanilla.
Nasayran gikan sa amahan nga naghambin og dakong problema ang iyang anak human gibuwagan sa iyang asawa nga usa ka magtutudlo sa usa ka dakong unibersidad sa Cebu City.
Matod sa amahan, sukad nagbuwag sa iyang asawa, aborido na ang pangisip ni Cañedo ug dili na masabtan tungod sa problema sa ilang panagbuwag.
Tungod niini, nitumaw usab ang angulo nga magpatambag kini sa Arsobispo.
“Niingon ang tatay niya nga naa daw deperensya sa pang hunahuna. Disturbed gyud sya kay nagka hiwalay sa asawa,” matod ni Chief Supt. Debold Sinas, direktor sa Police Regional Office (PRO) 7.
Gihulagway ni Sinas nga lehitimo ang pagpatay sa iyang mga sakop ni Cañedo sanglit nakita niini nga nibunot sa iyang armas.
Ngpasalamat nalang siya nga wala diha ang Arsobispo sa Sugbo tungod kay dako ang posibilidad nga mapusilan kini.
WALAY KAUSABAN
Bisan sa naasoy nga hitabo, sila si Msgr. Tan ug Bishop Villarojo nagkanayon nga walay usbon bahin sa seguridad sa compound. Gitawag nila nga
isolated case ug walay angayan nga kabalak-an.
“Wala tay gi adjust sa atong
security karon kay wala man ta mo feel og imminent threat. We are hoping nga this is an isolated case pero that is the police to say kay sila man ang nag investigate,” matod ni Tan.
Ang main gate sa compound dunay guwardiya apan wala kini nakamatikod nga may dalang armas ang maong lalake. Daghang tawo nga mosulod ug gawas sa dapit nga abli sa tanang magtutuo.
Apan si Sinas nagpabutang og usa ka pulis sa gate sa palasyo ug usa ka pulis nga di mag-uniporme sa sulod sa
compound, lakip sa iyang gikonsiderar ang paghatag og guwardiya sa Arsopbispo. /