Loot di na magpasubli sa pagka-mayor

Posibleng di na magpasubli pagka-mayor sa lungsod sa Daanbantayan si Mayor Vicente Loot sa eleksiyon sunod tuig.

Kini maoy gitug-an sa iyang step-son nga si 4th district Provincial Board Member Sun Shimura.

Matod ni Shimura nga gitun-an na sa ilang pamilya ang maong posibilidad tungod usab sa sitwasyon ni Loot diin pila ka higayon na kining gipasanginlan ni Pres. Rodrigo Duterte nga nalambigit sa ilegal nga drugas.

Dugang sa bokal nga sabutan pa sa pamilya ug sa ilang partido kon kinsa ang ihulip kang Loot sa higayon nga dili na kini magpapili sa pwesto.

Si Shimura nga anaa na sa iyang ikatulo ug katapusang termino sa Hunta Probinsiyal wa pay tataw nga plano sa sunod nga posisyon nga iyang lansaran.

Bukas hinuon siya nga mobalik sa pagka-mayor sa Daanbantayan o kaha mas ubos nga posisyon.

Sa iyang bahin, si Loot nikompirmar nga gikonsiderar na sa ilang pamilya nga di na siya magpasubli pa sa piniliay apan iyang giklaro nga wa y tataw o specific nga plano bahin niini sapagkakaron.

Si Loot nga gisuwayan unta pagtawag sa mga tigbalita, nangayog pasaylo nga di na siya sama kaniadto ka-accessible.

Matod niya nga nag-lie low una siya samtang nag-atiman sa iyang personal security concerns.

Gawas kang Mayor Loot ug kang Shimura, nahimo na usab nga mayor sa Daanbantayan si Maria Luisa Loot, asawa ni Mayor Vic ug inahan ni Shimura.