Bug-at nga silot sa counterflow
Alang sa hapsay ug hamugaway taliwa grabeng kahuot sa trapiko sa N. Bacalso Ave,, ipatuman sa Cebu City Transportation (CCTO) ang bug-at nga silot batok sa mga motorista nga mo-counterflow.
Si Mayor Tomas Osmeña niingon nga sugod kagahapon iyang gimanduan ang CCTO sa pag-impound sa motor o sakyanan sa violator sud sa 60 ka adlaw.
Si Osmeña adunay kasamtangang executive order number 034 nga nagsilot og 30 adlaw sa mga motorsiklo kansang driver ni-counterflow.
Target usab sa CCTO matod pa ni Osmeña ang mga kasikbit nga karsada sama sa F. Llamas, E. Sabellano, Tagunol sanglit mosamot ang trapik kon magpaugatay ang mga drayber.
Kini nunot sa nagpadayon nga construction sa underpass sa Barangay Mambaling nga nakamugna og di tiaw nga kahuot sa dagan sa mga sakyanan matag adlaw.
Ang mayor nibutyag nga mobuhat siya og pormal nga direktiba aron maoy magsilbing basehan sa CCTO kansang operasyon pangulohan ni Francisco Ouano.