Nabalaka na ang mga mayor
Apan ang hepe sa Philippine National Police (PNP) General Oscar Albayalde, namahayag nga di mabalaka ug mahadlok sa nahitabong sunodsunod nga pagpamatay sa mga mayor.
Para nako di man makiangayon ang pamahayag ni Albayalde, taliwa sa grabing pinatyanay ang nahitabo sa Pilipinas, makasulti kag ingon niini, General.
Kon di pa lang mahadlok makigsungay ang mga mayor ngadto ni Albayalde makasiguro ko dugay na nilang gibalikas kining tawhana.
Gikuhaan pag katungod ang mga mayor sa pagtudlo ug pagsuperbisar sa hepe sa ilang lungsod ug siyudad.
Naa man sa saktong lugar si Tuburan Mayor Aljon Diamante, naa sa dilikadong kahimtang ang ilang kinabuhi. Kay mahimong sakyan sa kontra sa pulitika.
Ang labing daling patyon ang mga sibilyan kay way mga bantay. Pagmatuod niini miabot na sa 20 mil ka mga tawo ang napatay gidudahang nalambigit sa drugas sa giingon ngariding in tandem.
Mga pulis ra ang gidudahan nga maoy nagpatay kanila. Mao sab ang pagtuo nga maoy nagpatay sa mga pulitiko nga anaa sa narcolist.
MAGBISE NI GWEN?
Mao na ba gyud kaha ni ang mahimong runningmate ni 3rd district congresswoman Gwen Garcia nga modagan sa pagka-gobernador nga iyang ikapares si Daphne Lagoon pagka-bise gobernador?
Una nang gipahibawo ni Gwen nga guwapa ang iyang bise gobernador alang karong 2019 midterm election.
Wa may laing guwapa nga kaila nga pulitiko nga kanunayng kuyog ni Gwen, di ba si Lagoon ra man nga suod sab niyang higala?
Si Lagoon makatabang man tuod og dako tungod sa kadaghan og kuwarta apan dakong problema kay way balwarte.
Gipildi man gani ni Mayor Aljon Diamante sa pagdagan sa pagka-mayor sa lungsod sa Tuburan, sa tibuok probinsya pa ba kaha?
Kon madayon, si Ivy Durano Meca, ang pangulo sa CPADAO sa Capitol, ang ika-atbang ni Lagoon .
Duna say pamahayag si Gobernador Junjun Davide, nga si Ivy usa sa mga gikonsidera nga mahimong runningmate.
Ang nagsunod sa dagan sa pulitika duna sab mga panglantaw nga mokuha si Garcia ug taga ika-limang distrito.
Kining tanan atong mahibaw-an kon duna nay opisyal nga pahibawo sa tagsatagsa nila ka partido ug sa pag file sa ilang certificate of candidacy karong Oktubre 30, 2018.