Unsay tuyo sa armadong tawo?

Daghan ang gustong masayod og unsay gidangatan sa mga imbestigasyon nga gihimo sa kapolisan bahin sa mga pang-hitabo diin makuhaan og daghan nga druga ang usa ka suspetsado.

Pananglit, kaniadtong miaging semana, dihay usa ka tawo nga nadakpan samtang naghupot og druga balor og 4.7 milyon pesos.

Sa pakisusi, dihay pangalan nga migawas - Madame.

Kinsa man kining maong “Madame?”

Unsay iyang kalabotan sa patigayon sa ginadili nga druga?

Daghan ang gustong masayod niini sanglit dunay mga mayor nga matod pa, naapil sa lista sa druga.

Kon babaye ang maong mayor, og siya maoy gipasabot sa suspetsado, angay nga himoon ang seryoso nga imbestigasyon.

Kining maong babaye nga mayor dunay nindot nga estorya.

Dihay panahon nga nangimbitar siya sa iyang mga higala sa iyang harianon nga panimalay.

Nag-andam siya og mga lamian nga mga sud-an og mga mahalon nga mga imnonon. Daghan ang mianha. Human og kaon sa mga bisita, dihay pipila ka buok nga mga “espesyal” nga mga bisita nga giimbitar sa mayor nga pasudlon sa usa ka kwarto sa taas.

Pagsulod sa kwarto sa usa ka bisita, dako kaayo ang iyang katingala sa dihang gitunoloan siya og usa ka gamay nga putos nga plastic sa mayor nga babaye.

Pagtan-aw pa niya sa putos, dihay puti nga mora og tawas sa sulod.

Diha pa niya nasabtan nga gihatagan diay siya og shabu sa maong mayor og ipagamit kini samtang diha siya sa sulod sa kwarto.

Dali-dali nga giuli sa bisita ang putos ngadto sa mayor og way tingog-tingog nga migawas sa harianong balay ang maong bisita.

Dili masukod ang iyang kasuko sanglit nagtuo diay ang maong mayor nga tig-gamitan siya og shabu.

Di man gani ko motabako, mag-shabu pa, matod pa sa bisita.

Human sa maong hitabo, maglikay na ang maong bisita nga makigkita o makigsulti sa maong mayor tungod kay dili siya makatuo nga siya mismo tunolan sa maong mayor og shabu.

Tinuod gyod diay ang estorya nga dunay kalambigitan ang maong mayor sa negosyo sa ginadili nga druga, matod pa sa bisita ngadto sa iyang mga amigo.

Kon tan-awon ang maong mayor, lisod katuhoan nga dunay kalambigitan sa druga.

Labi na kay kugihan kaayo nga makig-selfie ni PRRD og ni SAP Bong Go ang maong politiko.

Abtik pod kaayo nga magkumo samtang modip-ig ni PRRD panahon sa iyang selfie o groupie.

Mao kini hinungdan ngano nga gusto masayod ang mga katawhan sa mga imbestigasyon nga gihimo sa kapolisan kabahin sa druga.

Kinsa man gyod ang naapil sa lista sa mga tigpanalipod, tighangyo sa mga kapolisan, financier og uban pa nga mga kalihokan sa ginadiling druga.