Please be good to me

Nabasa gyud ko sa uwan pag-abot sa among balay. Human ko makuha ang akong tualya sa kuwarto, misulod ko sa banyo. Naligo ko. Nagtapis lang ko sa tualya paggawas ko sa banyo. Dako man ang tualya. Human ko makailis og para sa balay sa akong kuwarto, gipauga ko sa hangin sa electric fan ang basa kong buhok nga kutob sa abaga ang gitas-on.

Unya misandig ko sa headboard sa kama kay mitingog ang akong selpon. Si Samuel ang nagpadalag message.

“Can I invite you for a dinner tomorrow?”

Naghunahuna ko una ko replayi si Samuel. Nakig-dinner na ko kaniyag kausa. Si Samuel ang labing matinud-anon sa akong mga suitors. May pagsalig ko niya kay buotan man siya nako. Gikan siya maayong pamilya. Apan kadtong higayon nga nakig-dinner ko niya, iya mang birthday. Misugot ko sa iyang pag-imbetar nako tungod ani.

Naglikay ko sa pagkuyog sa pagpangaon sa gawas sa akong mga suitors kay di ko gusto nga lainon nila kini sa pagsabot. Basig magtuo sila nga nakagusto ko nila. Apan tungod kay sa akong paniid tinarong man gyud ang pagpangulitawo ni Samuel nako, maong nakig-dinner ko kaniya. Apan misaad ko sa akong kaugalingon nga kausa ra ko mokuyog niya sa pagpangaon sa gawas.

“Unsay okasyon, Sam?” Mao kini ang akong gireplay kang Samuel. Dali ra sab siyang nakareplay nako.

“Way okasyon, Reena. Gusto lang tikang ikaestorya.” Gireplayan ko dayon si Samuel. “Sorry, Sam. Di ko makakuyog nimo.”

“Ok lang. Maybe next time na lang.”

Wa ko na replayi si Samuel. Di ko gusto nga maglaom siya nga someday makig-dinner kog usab niya. Bisag almost one year nang nangulitawo si Samuel nako apan wa pa gyud ko makaseguro sa akong gibati niya. Kon nakaseguro pa ko nga love sab nako siya, aw, gisugot ko na siya. hagbay pa kaha. Apan morag inigsuon lang gyud ang gibati ko niya.

Tingali, someday kon segurado na kong kini ra gyud ang feeling ko niya, prangkahan ko na siya nga mohunong na sa pagpangulitawo nako. Gihatagan ko pag igong panahon ang akong kaugalingon sa paghunahuna bahin sa gipadayag nga gugma ni Samuel nako.

Unya kalit kong nahunahuna si Arnel. (SUMPAYAN)