KATROPA DILI MOPROTESTA
Mga duwa karon 4:30 pm- Ginebra batok Meralco 7:00 pm- San Miguel batok TNT
Dili na idayon sa Talk N’ Text KaTropa ang ilang plano nga mosang-at og opisyal nga protesta sa ilang 121-110 nga kapildihan batok sa San Miguel Beermen sa Game 1 sa ilang quarter-finals series niadtong Lunes sa Philippine Basketball Asspociation (PBA) Commissioner’s Cup sa Araneta Coliseum.
Nagkanayon si KaTropa team manager Virgil Villavicencio nga ilaha na lang gidawat ang kapildihan diin nausikan nila ang ilang 23 puntos nga labaw sa 2nd quarter.
Gipasabot ni Villavicencio nga mas nagtutok na sila nga makabawos sa Game 2 sa main game karong gabii aron makapugos og deciding Game 3 sa series.
Human sa Game 1, dayag sila si Villavicencio ug head coach Nash Racela sa ilang kasagmuyo sa tawag sa mga referee nga maoy hinungdan nga ning-graduwar ang import sa KaTropa nga si Joshua Smith sa nahabiling 3:39 minutos.
Niadtong mga gutloa, igo ra nga naglabaw og upat ka mga puntos ang Beermen, 110-106.
Gisuwatan ni Villavicencio ang scoresheet og “Under Protest” pagkahuman sa kombati.
Gipasabot ni commissioner Willia Marcial nga wala’y bili ang gisuwat ni Villavicencio sa scoresheet kon dili mopadangat og opisyal nga suwat reklamo ang KaTropa.
Sa laing bahin, ang Brgy. Ginebra Gin Kings mosuway sab pag-ambak sa semi-finals sa ilang pagpakigbatok og balik sa Meralco Bolts sa premirong duwa karong hapon sa Game 2 sa ilang kaugalingong best-of-three series.
Ang Gin Kings mipagawas sa tanan nilang makaya aron lupigon ang Bolts, 88-81, sa Game 1.
Ning higayuna, nagkanayon si Ginebra coach Tim Cone nga kinahanglan nilang mangandam og maayo tungod kay seguradong magbangis ang Bolts.
“They’re gonna come out with great force to start the game and we gotta come out with our own force and see if we can beat it,” matod ni Cone.
“You meet force with force that’s the only way you could do it.”
Matod ni Cone nga nasagubang na nila kon unsa’g puwedeng mahimo sa Bolts sulod sa korte ug suwerte na lang sila nga nakaeskapo sila dala ang kadaugan sa Game 1.
“They’re No. 1 in the league in 3-point shooting and they’re No. 1 in the league in defense. I think they played to their character today, especially in that first half,” batbat pa ni Cone human sa Game 1.
Nidugang ni Cone nga kinahanglan sab nilang pahugtan ang ilang depensa hilabi na ngadto nila ni import Arinze Onuaku, Baser Amer, Jared Dillinger, Chris Newsome, Cliff Hodge ug Ranidel de Ocampo.
Sa ilang bahin, ang Gin Kings magsalig og maayo sa ilang import nga si Justine Brownlee lakip na nila ni 7-footer Greg Slaughter, Joe Devance, LA Tenorio, Scottie Thompson ug Japeth Aguilar.
“It’s going to be, again, a defensive battle because they play great defense and somehow we gotta just try and come out and meet their force,” dugang ni Cone.