CEBU CITY DI NA LUWAS -- OSMEÑA

TUNGOD SA SUNODSUNOD NGA PATAY; DI TINUOD: PRO 7

Gihulagway ni Mayor Tomas Osmeña nga di na sama kaniadto kaluwas puy-an ang dakbayan sa Sugbo resulta sa sunodsunod nga patay nga nahitabo sa siyudad.

Kini human yano ra kaayo sa mga gunman pagbitbit sa ilang mga pusil ug tira ngadto sa mga tawo nga maoy ilang target.

“Not so safe. What I’m saying is, the criminals are not afraid. Even in the street level, the snatchers, people get robbed, that’s why I

missed (SPO1 Adonis) Dumpit,” padayag ni Osmeña.

Si Dumpit kinsa bag-ohay pang gilubong human sa giingong engkwentro didto sa Bohol pipila na ka semana ang nakalabay, maoy sinaligan kaniadto ni Osmeña pagkontrolar sa mga badlungon sa katilingban hilabi na niadtong sayong bahin sa dekada 2000.

Niadtong Hulyo 10, usa ka Jeffrey Cañedo ang napusilan patay sa kapulisan human nisulod sa compound sa Archbishop’s Palace dala niya ang armas ug nagtuo sila nga tuyo niini si Archbishop Jose Palma.

Sa pagkahapon, gipusil patay sa wa pa mailhing gunman si Kalunasan barangay councilor Roel Mabano sulod sa barangay hall.

Ang pagpatay nakuha sa closed circuit television (CCTV) sa barangay, apan di maklaro ang dagway sa gunman kay nagkawo ug bati usab og kalidad ang CCTV footage. Pagkagabii, duha ka mga security guard ang nagpinusilay sa usa ka convenience store sa Barangay Mabolo nga nisangko sa ilang kamatayon. (Estorya sa pahina 3).

YANO RA

Si Osmeña kinsa nakakita sa CCTV footage kon giunsa pagpatay si Mabano, kanhi pulis, nihulagway nga yano ra nga nikutlo sa kinabuhi ang gunman bisan sa daghang mga tawo.

Gipadayag ni Osmeña nga anaa sa hustong direksyon ang gibuhat nga lakang ni Sr. Supt. Royina Garma, bag-ong director sa Cebu City Police, sanglit gipadaghanan ang mga pulis sa karsada inay adto magyampungad sa police station.

Ang mga pagahimuon nga lakang ni Garma pagapaluyohan ni Osmeña.

Apan ang Police Regional Office 7 nisupak sa pamahayag ni Osmeña.

Matod ni PRO 7 Director Debold Sinas nga labing luwas nga puy-an ang Sugbo itandi sa ubang lugar sa nasud.

Iyang gitandi ang lugar sa Mindanao sama sa Cotabato ug Autonomous Region in Muslim Mindanao nga ubos ang crime volume itandi sa Sugbo kay kadaghanan sa krimen sa maong mga dapit wa ma report sa PNP.

Dinhi taas ang natala kay ang mga tawo mo-report gilayon.

Mas pilion nga bisitahon ug puy-an ang Sugbo tungod sa ilang siguridad.

/ ALAN TANGCAWAN ■ PINUSILAY: Gisusi sa kapulisan ang crime scene sulod ug gawas sa usa ka convenience store sa dan Osmeña sa Barangay Mabolo, dakbayan sa Sugbo, diin nagpinusilay ang duha ka mga security guard. Sa gawas nagligdas ang lawas ni Anjen Lagmay, 21, samtang sa sulod ang kang Junifer Teniano, 24. Ang duha pulos nangamatay sa ilang mga samad nga naangkon atol sa hitabo alas 11:30 sa gabii niadtong Martes. Estorya sa pahina 3.