Pamilya, mga silingan nanawagan og hustisya

Nanawagan og hustisya ang mga residente sa Sitio Bato, Barangay Ermita, dakbayan sa Sugbo sa kamatayon sa 4 anyos nga batang lalake sa usa ka buy bust operation sa Carbon police station sa Cebu City Police Office (CCPO) niadtong Martes sa alas 3 sa hapon.

Usa ka petisyon ang gipirmahan sa mga residente alang ning panawagan.

Gusto sa pamilya ug sa mga residente nga masuta kinsa ang nakaingon sa kamatayon sa bata.

Matod ni Marc Anthony Abatayo nga mag-agad siya sa iyang asawa ug pamilya niini kon unsa nga lakang ang ilang pagabuhaton.

Bisan kon nimando ang Police Regional Office (PRO) 7 og imbestigasyon, si Director Chief Superintendent Debold Sinas nanalipod sa iyang mga ginsakpan.

Matod niya nga lehitimo ang operasyon sa iyang mga sakop.

Apan si Marc Anthony, 27, nagtuo nga pulis ang nakapusil patay kang Bladen Skyler, 4, anak human ang usa sa mga operatiba niduol kaniya ug nangayog pasaylo.

Si Senior Inspector John Kareen Escober nihimakak hinuon nga usa sa iyang mga sakop ang nakapatay sa bata sanglit wa sila makapabuto.

Ang pagpangayog pasaylo sa pulis tungod kini sa nahitabo sa bata nga namatay atol sa operation ug nisimpatiya sa pamilya.

“Ang pagpangyog pasaylo sa atong pulis tungod to sa insidente nga namatay ang bata. Luoy baya nga nadamay ni sa pagpusil atong suspek,” matod ni Escober.

Andam hinuon nga atubangon sa CCPO ang imbestigasyon nga himuon sa laing ahensya kon moduol ang mga kabanay.

NAGTUON

Gisusi sa Super Balita Cebu ang dapit ug nasuta nga ang balay nga gipahigayunan sa police operation ug balay sa mga Abatayo nagtupad ra.

Matod ni Marc Anthony nga adunay kaduwa ang iyang anak sa ilang kwarto apan nigawas kini ug nanuktok sa kwarto sa iyang asawa nga nagtan-aw tan-aw sa mga hulagway sa cellphone.

Gipasulod ni Gwynn Shanieka ang ilang anak ug iyang gitudluan sa pagsulat sa iyang ngalan.

Nakurat si Gwynn Shanieka pagkadungog niya og buto ug nagtuo nga spark ra kini sa kuryente.

Pagkakita niya sa iyang anak, kalit kining nalup-og ug natingala siya nga nagkadug.

Iya dayon kining gigakos ug nangayo kini og panabang.

CCTV

Makita sa footage sa close circuit television (CCCTV) sa Barangay Ermita nga pulis ang nagkugos kang Bladen Skyler aron dad-on sa Cebu City Medical Center (CCMC), apan patay na kining niabot sa ospital.

Asoy pa sa mga resedente nga way pinusilay nga nahitabo kay usa ra ka buto sa armas ang ilang nadunggan.