2 ka mga bata nga missing sa Mingla napalgang patay sa baybayon

Nakit-an na sa emergency responders ang duha ka mga bata nga nangalumos samtang nangaligo sa baybayon sa Sitio Tabay, Barangay Lower Calajoan, lungsod sa Minglanilla niadtong Martes sa udto.

Human sa pila ka oras nga pagpangita, unang napalgan sa Minglanilla rescue team ang lawas ni Seigfreid Sagadsad,9, nga nag lutaw-lutaw sa baybayon sa Barangay Tungkil, alas 10:50 sa buntag kagahapon.

Ang Barangay Tungkil kasikbit lang nga barangay sa gikaligoan sa mga biktima.

Pag alas 12:40 kagahapon sa udto, sunod nga nakit-an sa Bantay Dagat sa Minglanilla ang lawas ni Jian Andre Villegas Catarino,10, nga nag lutaw-lutaw mga 300 ka metros ang gilay-on gikan sa ilang gikaligoan.

Matod ni Minglanilla local disaster officer Myrrha Daven nga nanghinabi sa Superbalita Cebu, ang duha ka mga bata positibo nga giila sa pamilya niini human gidala sa Rural Health Unit (RHU) sa Minglanilla.

Ang lawas sa mga bata gidala sa Holy Spirit Funeral Parlor.

Nasayran nga ang duha ka mga bata, uban sa laing duha ka mga kuyog, wa manulod sa ilang klase ug nangaligo sa maong dapit.

Samtang nangaligo, kalit nga nikusog ang bawod ug nadala silang upat sa lawod.

Ang igsuon ni Seigfried nga si Jeffrey maoy unang lawas sa mga tawo sa dapit.

Laing bata nga ilang kuyog naluwas usab.

Giawhag sa Provincial Disaster Risk Reduction and Management Office ang mga ginikanan nga pahugtan ang pagbantay o pag-monitor sa ilang mga anak nga nagtungha, ilabi na kon makaagi sila og dagat o kaha sapa sa pagpadulong sa eskwelahan ug pagpauli sa pinuy-anan.