Pabuto, di IED ang miulbo
Usa lang ka firecracker ug dili improvised explosive devise (IED) ang gilabay sa wa pa mailhing suspek sa Hilton Motors Corporation nga gipanag-iya ni Peter Lim sa miaging semana.
Kini maoy resulta sa imbestigasyon sa Mandaue City Police Office (MCPO) nga nihimo og case conference inabagan sa special units nga nagtutok sa maong kaso.
Si PCInsp. Mercy Villaro, information officer sa MCPO nagkanayon sa dihang nahinabi sa Superbalita Cebu nga pulbora nga igo lang giputos og mga papel ang gilabay sa wa pa mailhing lalake sa maong establisamento nga nahimutang sa Barangay Subangdaku.
“Sa technical evaluation sa Explosive Ordnance Disposal team, wala siya niresulta nga na-belong siya sa IED. Usa lang gyud siya kadako nga firecracker cause it contains purely pulbora nga giputos sa usa ka baga nga papel,” asoy ni Villaro.
Sukwahi ang maong resulta sa naunang findings sa kapulisan nga gihulagway nga usa ka low-powered IED.
Gitataw ni Villaro nga matawag lang nga usa ka bomba o EID kon aduna kiniy switch, power source, initiation, container o sudlanan sama sa plastic, bildo, pabuto ug enhancements sama sa chemical o fragments nga makamugna og dakong damage.
Gilangkuban sa crime laboratory, anti-cybercrime group, ug uban pa ang nitambong sa case conference sayo ning semanaha.
Nagkanayon ang opisyal nga gawas sa labor dispute nga motibo sa pagpangatake sa establisamento, laing angulo ang gitan-aw sa mga imbestigador mao ang nga kakompetensya sa negosyo ni Lim.
Padayag ni Villaro nga palawman pa nila ang labor dispute nga motibo sanglit base sa ilang information gathering, adunay mga kawani nga wa pa mahatagi og sakto nga benefits.
Susihon sab sa mga imbestigador ngadto sa National Labor Relations Commission (NLRC) sa kaulohan kon adunay mga kaso nga nadawat ang maong ahensya kalabot sa sumpaki sa management sa Hilton Motors tali sa mga kawani niini.
Samtang ipaubos sa enhancement sa anti-cybercrime group ang mga CCTV footage nga nakuha sa kapulisan duol sa establisamento sa dihang nasuta nga dili klaro ang kuha sa CCTV.
Adunay kuha sa CCTV diin makita nga kalmang naglakaw gawas sa establisamento ang suspek dayon labay sa pabuto.