Nasaypang ‘boring’
Nahimutang karon sa kontrobersiya ang bag-ong napiling kapitan sa Barangay Mabolo nga si Nina Mabatid. Kini human mikatap sa social media ang kuha sa CCTV sa Waterfront Hotel nga naningka og hotel detective ug duty manager si Mabatid niadtong gabii sa June 19. Sa maong CCTV footage, nakita nga si Mabatid adunay kuyog nga medyo edad-edaran nga lalaki.
Makita usab nga mosulod sila sa elavator sa dihang medyo giharang o gisita sila sa usa ka house detective. Makita nga gitudlo-tudlo ni Mabatid ang house detective. Wala pa mo-alma ang kuyog ni Mabatid nga na-ilhan nga si Dr. Ramon Floresca nga usa ka negosyante nga taga Kidapawan City.
Mosulod na unta sila sa laing elevator apan gisunod gihapon sila sa maong house detective. Nasipaan si Floresca ug natukmod ang detective. Miabot ang babaye nga duty manager nga natukmod usab ni Floresca. Samtang si Mabatid nagsige usab og babag-babag daw gusto niyang ipakalma si Floresca.
Walay audio nga madungog sa maong CCTV footage busa dili nato masabot kon unsa ang ilang gilalisan ug nganong misangpot sa ingon niadto. Dili kita dayon maka-judge kon nag-eskandalo ba si Mabatid. Dili man siguro eskandalo o krimen kon mogamit lang ang usa ka tawo sa iyang tudlo sa pagtudlo og laing tawo. Dili man to eskandalo.
Apan matod pa ni Mabatid nga misaka ang iyang tingog, napugos siya sa pagtudlo-tudlo sa maong house detective kay gipugos siya sa pagpa-log book o register nga unta official guest man sila. Morag nahulog man nga prostitute siya nga aduna man silay relasyon ni Floresca. Gani iya mang gi-angkon nga kasado sila didto sa US.
Bisan kinsa naman pod og dili ayuhon sa pag-approach, malain yud ug posible nga mo-ulbo ang kaspa. Tiaw nimo nang usa ka kapitan ug tag-iya og dakong international company nasaypan mga “boring.” Daghan man pod god mo-estambay nga mga babayeng high class prostitute diha sa hotel lobby nga mangita og kustomer. Sus, kagamay ra ning maong isyu. Miscommunication lang ni. Apan gipadako sa uban kay public official naman si Mabatid ug nagplano pang modagan sa pagka-presidente sa Association of Barangay Council (ABC).
(bobbygnalzaro@gmail.com)