Please be good to me
Wa lang gyud nako tuyoa nga mahunahuna si Arnel. Porbida, morag duna may kahulogan ang iyang tinan-awan nako. Guwapo man unta si Arnel. Apan ang iyang pagka maldito, pagka burukinto sa among lugar angay nga kahadlokan. Di man nuon siya mabugal-bugalon sa mga babaye apan gilikayan siya sa mga girls sa among dapit.
Kinsa man say babaye nga makigsuod niya? Na, lisod na kon buhatan og daotan.
Pagka buntag, wa gyud ko magdahom nga naghuwat si Arnel nako sa eskina. Makalagot sab gyud, uy, kay dugay nga miagi ang mga dyip paingon sa downtown! Makasakay na unta ko ug makapahilayo na kang Arnel.
Nakahigayon siya sa pagpakig-estorya nako.
“Nganong naglikay man mong mga girls nako, Reena?”
Seryuso si Arnel. Buotan kaayo siya karong buntaga. Giprangkahan ko siya.
“Kinsa man say di maglikay nimo, Nel? Ikaw ang kanunay mangitag gubot dinhi sa ato? Gikahadlokan ka dinhi, uy.”
Wa ko pakitaig maayong pagtagad si Arnel. Apan wa man koy nakita sa iyang nawong nga nasuko siya nako.
“Ayaw paglikay nako, Ren. Please. Gusto kong magkig-friend nimo.” Nagpabiling seryuso si Arnel. “Pero kanang imong pagka burukinto maoy akong gilikayan nimo, Nel. Aside from that, wa sab ka magtarong sa imong pag-eskuwela. Pero kon makig-friend gyud ka nako. puyde but please be good to me.”
Dali ra kaayong nakatando si Arnel.
“Oo, Reena. Promise, mahimo kong buotan nimo. Pero please ayaw sab ko hukmi dayon.”
“Sori, Nel. Pero sa pagka karon nahibaw-an na man dinhi sa ato kon unsa ka, kon unsa ang imong pagka tawo ug kinaiya. Well, may dako pang panahon nga mausab ang pag-ila ug pagtan-aw sa mga tawo nimo dinhi sa ato.”
Wa na makatubag si Arnel kay dunay dyip depasaheroan nga miabot ug gipara nako ug misakay sab dayon ko. Pagdagan na sa dyip, gitan-aw ko si Arnel. Giwara-warahan ko niya sa iyang kamot. Seryuso gihapon siyang nagtan-aw nako.
Hilom kong nakapanghupaw. Naanugnan ko sa pagka tawo ni Arnel kon di siya magbag-o ug magbinuotan, labi na gyud sa iyang pag-eskuwela nga maoy basehanan sa iyang maayong future.
Pagka hapon, paggawas nako sa gate sa university nga akong gitunghaan, naghuwat si Samuel nako.