Dok Paz

ART E. CANARES Minglanilla, Cebu

Dalaga, guwapa, ug labaw sa tanan, maayo kaayo og batasan si Doktora Paz Demano. Midaghan ang kliyente ug pasyente sa Maayo Healthcare Center dihang siya na ang nagdumala. “Dok Paz” ang sangpit sa mga tawo kaniya.

Moderno nga pamaagi ang gigamit ni Dok Paz, usa ka psychiatrist ug neurologist nga didto mabatid sa Germany. Nahagit karon ang iyang katakos niining pasyente nga katalirungan niya. Si Luz Hazul, 28 anyos, may kapuyo, usa ka “insomniac”. Agi’g pasiuna, gisultihan ni Dok Paz ang pasyente nga mo-check in sa Very Important Patient (VIP) room. Iya kining gihatagan og nutbok ug bolpen dayong ingon:

“Ikaw rang usa didto sa VIP room, way motugaw nimo. Isuwat sa notebook ang imong mga problem. Ipagawas ang imong hunahuna. Kon gusto ka mosulti – sige, iyawyaw, iapil mga balikas, isinggit imong kahiubos ug kasakit. Kon gusto ka mohilak -- sige, hutda imong luha. Kon di pa ka makuntento, naay mga butang diha sa kwarto nga imong kapahimungtan. Naa ra nimo unsay imong buhaton aron makahungaw ang imong gibati!”

Nagpanagana nga misulod si Luz Hazul sa VIP room. Gisundan siya’g tan-aw ni Dok Paz nga misulod sa laboratoryo nga sikbit sa VIP room. Gi-monitor ni Dok Paz ang mga lihok ni Luz didto pinaagi sa CCTV.

Samtang nagtan-aw siya sa pasyente nga nagyawyaw nga nagsulat sa nutebok, naghunahuna si Dok Paz sa tambal nga gamiton. Iyang gikuha gikan sa kabinet ang garapa sa placebo pills. Mao kini ang matang sa tambal nga mo-epekto lamang kon motuo si Luz Hazul nga makaayo kini kaniya.

Nagkadusingot si Luz dihang migawas na sa VIP room. Morag nahuwasan kay misanag ang iyang hitsura. Milutaw ang tinuod niyang kaanyag. Gisugat siya ni Dok Paz, gilamano si Luz nga morag gradweyt sa kindergarten. Gitunol sa doktora ang garapa sa placebo pills kang Luz sama nga nagtunol og diploma, uban sa instruction unsaon paggamit ang tambal.

Gibasa ni Dok Paz ang mga gipanulat ni Luz sa nutebok. Iyang giabanid pagbasa ug gihan-ay kon huyang o ligon ba ang pangutok ni Luz. Unya naabot siya sa panid nga gisaway ni Luz ang kapuyo: “ang akong partner kay bakang, mubo, yakmo, pislat, tangkag, palahubog, sugarol, himabaye, pisot nga dako og ….” Wala motiwas pagbasa si Dok Paz.

Usa ka semana ang milabay dihang nakadawat og tawag si Dok Paz sa selpon. “Dok, si Luz Hazul ni. Sus! Salamat kaayo Dok! Maayo na kaayo ang akong pagkatulog. Di kaha ni makadaot kon magsige lang ta’g katulog ini?” Mipahiyom si Dok Paz kay sakto gyud iyang pangagpas.

Nianang pagka sunod adlaw nahitabo ang wala damha. Miabot sa klinika ni Dok Paz ang lalake nga maoy unang nakabihag sa iyang kasingkasing. Guwapo, sakto sa barog, dako’g lawas ug angayan kaayo nga nagsul-ob og amerkanang puti.

“Love at first sight!” nakatuaw si Dok Paz sa hilom. Apan kalit nabalitok ang iyang kalibutan dihang nagpaila ang lalake nga siya ang bana ni Luz Hazul, ang pasyente nga mi-eskapo sa National Mental Hospital.

Gipiyong na lamang ni Dok Paz ang iyang mga mata. Abi niya’g natapos na ang iyang sugilanon.

(KATAPUSAN)