FRANCE SA FINALS
Nakaabante sa Soccer World Cup finals ang France human niini gipukan ang Belgium, 1-0, sa ilang semi-finals nga pinatiray kagahapon sa St. Petersburg, Russia.
Si Samuel Umtiti maoy nahimong bayani sa France human niya napasulod ang bugtong goal sa duwa pinaagi sa iyang
header sa ika-51 minutos. Sa finals, ikaharong sa France ang modaog sa laing engkuwentro sa semi-finals tali sa Croatia ug England.
“Vive la France! Vive la Republique!” singgit ni France forward Antoine Griezmann atol sa pagsaulog sa France human sa duwa.
Gawas sa iyang goal, si Umtiti nakatabang sab og dako sa depensa sa France nga nakapakgang sa Belgium, nga
naila sa ilang opensa. “It’s me that scored,” asoy ni Umtiti, “but we all delivered a big game.”
Ang mga magduduwa sa France nanayaw sa field human mitingog ang final buzzer unya malipayong nanag-awit ang ilang mga sumosunod.
Labing seguro, nanghinaot ang mga sumosunod sa France nga magpadayon ang ilang kasaulogan karong Dominggo sa
final game sa Moscow.
Ang France, kansang mga magduduwa nag-average og 26 anyos, katapusang nakalangkat og korona ning pretihiyusong kompetisyon niadto pang 1998. “We’re immensely privileged to be in the World Cup final,”
matod ni France coach Didier Deschamps.
“It was so painful two years ago we have to savor it.”
Si Deschamps aduna na’y kahigayunan nga mahimong ikatulo pa lang nga nilalang nga makalangkat og kampiyunato isip usa ka magduduwa ug usa ka coach.
Ang nag-unang duha nga nakahimo niini mao sila si German great Franz Beckenbauer ug Mario Zagallo sa Brazil.
Dihang naangkon sa France ang korona niadtong 1998, si Deschamps pa maoy team captain.
Si Deschamps nakasinati sab og mga pagsaway dihang pakyas siya sa pag-agak sa France sa finals bisan gilangkuban kini og superstars nga mga magduduwa.
Apan ang tanang mga pagpanaway kalit lang nahanaw sa usa ka bula dihang nakaabot ang France ning puntoha hilabi na kon molampos kini pagbira sa titulo. Angayan sab daygon ang
goalkeeper sa France nga si Hugo Lloris, kinsa duha ka mga higayon nga nakapakgang og goal unta sa Belgium.
Mi-dive si Loris sa tungatungang bahin sa 1st half aron pugngan ang tira ni Toby Alderweireld unya nasundan kini niya’g laing pagpugong sa tira ni Romelu Lukaku sa hinapos nga bahin. “Unfortunately for us, the difference is just a dead-ball situation, a set play,” matod ni Belgium coach Roberto Martinez.
“The game was, as you can imagine, very close, very tight, and it was going to be decided (on) maybe the one that could find that final touch in the box.”
Lain na sab kining sakit nga kasinatian alang sa Belgium. Ang Belgium nakaabot sa
quarter-finals sa 2014 World Cup ug hasta sa European Championship niadtong 2016 apan napakyas kini pagabante sa finals.