Tinaktakay sa PBA
Duwa karon
7:00 pm- GlobalPort
batok Rain or Shine
Magtinaktakay sa nag-inusarang duwa karong gabii ang No.1 team Rain or Shine Elasto Painters ug No.8 GlobalPort Batang Pier sa quarter-finals sa Philippine Basketball Association (PBA) Commissioner’s Cup sa Mall of Asia Arena sa Pasay City.
Niadtong Martes, ang Batang Pier nakamugna og dakong surpresa dihang ilang gipakuratan ang grabe ka inilog nga Elasto Painters, 114-113, aron paghan-ay ning maong tigakay nga engkuwentro.
Isip No.1 team human sa elimination round, ang Elasto Painters naggunit og twice-to-beat nga bintaha isip benepisyo.
Ang import sa Batang Pier nga si Malcolm White nakamugna og krusyal nga mga puntos aron pangulohan ang ilang kadaugan niadtong Martes pinaagi sa iyang 28 puntos ug 16 rebounds.
Kuyaw sab nga nakaduwa si Jonathan Grey ug nidugang kini’g 22 puntos alang sa kadaugan.
Kinahanglang makapakita gihapon og saktong labok sila si White ug Grey ning higayuna aron makompleto nila ang ilang malisod nga tahas sa pagdispatsar sa Elasto Painters.
“It’s just believing in my teammates and having their confidence,” matod pa ni White human sa maong duwa.
Nanghinaot si White nga dili molubad ang ilang duwa.
“We just gotta bring the same intensity we brought the whole game. We gotta run the floor, play hard, and believe in each other,” dugang ni White.