KALUHA NGA KASAULOGAN
Kaluha nga kasaulogan ang gitagamtam sa University of the Visayas (UV) sa miaging gabii human nakalangkat og mga kampiyunato ang magsuong Green Lancers ug Baby Green Lancers sa miaging gabii sa Cebu Schools Athletic Foundation Inc. (CESAFI) 2018 Partner’s Cup Pre-Season Tournament sa Cebu Coliseum.
Unang nagsaulog ang Baby Green Lancers human nila gipangmakmak og balik ang University of Southern Philippines Foundation (USPF) Baby Panthers, 80-65, sa Game 2 aron haruson pagdaog ang best-of-three series ug langkaton ang korona sa high school division.
Mga duha ka oras gikan niini, nagsadya sab ang Green Lancers human nila giusban pagpukan ang University of Cebu (UC) Webmasters, 7671, sa Game 2 aron haruson sab ang ilang finals series ug labnihon ang titulo sa college division.
Ang Green Lancers ni coach Gary Cortes, nga ningkombati nga wala ang ilang 6’8” nga import nga si Lassina Coulibaly sa Ivory Coast, ning-agi og grabe ka lisod nga dalan una nila nadispatsar ang Webmasters. Naangol ang tuo nga tuhod ni Coulibaly sa Game 1.
Ningkayod og maayo ang lokal nga mga sakop sa Green Lancers hilabi na si Michael Maestre aron tapakan ang haw-ang nga nabiyaan ni Coulibaly.
Gimugna ni Maestre sa 4th quarter ang 14 sa iyang kinatibuk-ang 20 puntos aron pangulohan ang Green Lancers, nidugang og 17 puntos si Rey Suerte samtang niamot og 11 puntos si Sheldon Gahi.
Kanunay untang naglabaw ang Webmasters, gani miabot pa og 12 puntos ang ilang bintaha, 43-31, sa sayong bahin sa 3rd quarter.
Human niini, gipangulohan ni Gahi ang 11-2 nga rally sa Green Lancers nga maoy nagpahak og dako sa labaw sa Webmasters, 42-45.
Taodtaod sab nga nagtinubagay ang duha ka mga kampo sa pamugna og puntos hangtod nga natabla ang duwa, 58-58, pinaagi sa threepoint shot ni Suerte. Nagkumboya sila si Suerte ug Maestre aron hatagan ang Green Lancers og 67-63 nga labaw sa nahabiling 3:48 minutos.
Ningmugna og upat ka sunodsunod nga puntos ang Webmasters gikan sa ilang import nga si Frederick Elombi ug Paul Galinato aron tablahon pagbalik ang kombati, 7171, sa nahabiling 59 segundos.
Naghinugtanay sa depensa ang duha ka mga kampo apan nakaipsot si Maestre sa pagmugna og puntos sa ilawom nga bahin gikan sa maayong assist ni Suerte aron hatagan ang Green Lancers og 73-71 nga labaw sa nahabiling 18 segundos.
Sa return play, ang pambatong pointguard sa Webmasters nga si Justine Dacalos mipugos paglusot sa huot kaayo nga depensa sa Green Lancers ug nailog ni Gahi ang bola ug misutoy kini sa pag-layup aron inaton ang ilang labaw sa 75-71 sa nahabiling 2.9 segundos.
Sa iyang kapungot niadtong mga gutloa, milabay si Webmasters coach Raul “Yayoy” Alcoseba og lingkuranan sa tungatungang bahin sa korte ug natawagan siya’g technical foul.
Nakapasulod og usa ka technical freethrow si Suerte aron pagselyo sa kadaugan sa Green Lancers./