PULIS, KONS GIPANGTIPI
HEPE SA CCPO MIMANDO SA TANANG DURUGISTA SA PAGLAYAS NA
■ GIBANHIGAN: Si PO1 Avita Sarzuelo, 46, sa sulod sa iyang awto nga patay na pipila ka metros gikan sa panimalay sa Barangay Poblacion, lungsod sa Tubuelan kagahapon sa alas 5:30 sa kaadlawon.
Nunot sa sunodsunod nga kaso sa pagpamatay, si Sr. Supt. Royina Garma, direktor sa Cebu City Police Office (CCPO) nibahad sa mga durugista nga dili na sila luwas ug nimando nga molayas sa dakbayan.
Si Garma niluwat sa maong pamahayag taliwala sa pagbanhig-patay sa usa ka babaye nga pulis sa lungsod sa Tubuelan ug pagpusil-patay sa usa ka kanhi konsehal sa Barangay Lorega, Cebu City kagahapon.
“You leave the city if you want to live. Find a place where drugs are okay so punta ka duon kung welcome ka,” matod ni Garma.
Ang mga ulahing kaso sa patay sa dakbayan dunay managlahi ang motibo, apan pipila niini dunay kalambigitan sa ilegal nga drugas.
Giangkon ni Garma nga abunda gihapon ang supply sa ilegal nga drugas sa siyudad bisan sa ilang hugot nga kampanya nga gipatuman sukad milingkod si President Rodrigo Duterte sa pwesto.
POLICEWOMAN
Natusaktusak sa mga bala si PO1 Avita Sarzuelo, 46, dihang gibanhigan samtang nagsakay sa iyang awto pipila ka metros gikan sa panimalay sa Barangay Poblacion, lungsod sa Tubuelan kagahapon sa alas 5:30 sa kaadlawon.
Si Sr. Insp.Emmanuel Rabaya, hepe sa Tabuelan Police station nga nahinabi sa Superbalita Cebu, nagkanayon nga si Sarzuelo, nagpadulong sa merkado sa lungsud aron moadto sa iyang tindahan sa karne, litsonan ug iyang kan-anan.
Apan 50 metros lang ang gilay-on gikan sa iyang paggawas sa panimalay gipauwanan og mga bala sa wala mailhing mga mamumuno nga nagsakay og motorsiklo.
Si Rabaya nibutyag mga human sa pagpamusil, nisibat ang mga mamumuno paingon sa norte nga bahin.
Dugang niya nga usa sa ilang gisubay nga motibo sa pagkakaron ang kalambigitan ni Sarzuelo sa ilegal nga drugas.
Nalakip si Sarzuelo sa listahan ug gipaubos sa imbestigasyon.
Kasamtangan siyang gibutang sa Provincial Holding Admin Units(PHAU) sa Cebu Police Provincial Office (CPPO) niadtong 2016.
Lakip sa gisusi ang gikabangi niini niadtong milabayng bulan diha sa ilang lungsod.
Si Sarzuelo, classmate kini ni Konsehal Roel Mabano, retired sa gipusil-patay sa Kalunasan, Cebu City niadtong Martes, Hulyo 10, ug laing pulis nga namatay nga si “Vallente” sa dakbayan sa Mandaue.
KANHI KONSEHAL
Usa ka kanhi konsehal sa Barangay Lorega San Miguel, Cebu City ug naparot nga kandidato sa pagka-kapitan sa samang dapit sa milabayng eleksyon ang gipusil-patay sa wala pa mailhing mamumuno pasado alas 11 sa milabayng gabii.
Si Glenn Mark Manal, 39, taga Lower Lomar, Barangay T. Padilla, nakaangkon og mga samad pinusilan sa lawas.
Sumala sa kapulisan, usa ka lalake ang kalit niduol ni Manal ug namusil, nisibat sakay sa naghuwat nga motorsiklo.
Matod ni Garma nga daghang anggulo ang ilang gisubay apan ang labing duol mao ang drugas.
Wala usab nila wad-a ang posibilidad ang personal nga angulo sa krimen ug ang may kalabutan sa politika sanglit kandidato kini sa milabayng ekeksiyon.
Apil sa ilang tan-awon ang posibling adunay laing grupo nga nipatay sa kanhi konsehal nga mao usab karon ang ilang rumbo sa imbestigasyon.
Gitug-an ni Garma nga si Manal giingong kasosyo kaniadto sa usa ka Russ Aquino nga gipatay usab sulod sa merkado publiko sa Barangay Lorega sa wala pa gihapon mailhi nga kriminal.
Adunay nakasaksi sa hitabo apan nagdumili pa kini pagluwat og pamahayag sa kapulisan tungod sa kahadlok nga siya balikan sa nagpusil sa konsehal.
Gipasusi na karon sa kapulisan ang rogues gallery nga adunay hulagway sa mga notadong gun-for-hire o mga hit men ug ipakita sa mga tawo nga nakasaksi sa pagpamusil ni Manal.
Tungod niini, gihatagan og tagal ni Garma ang Parian police station 1 sa pagsulbad sa kaso sud sa 48 oras sugod kagahapon ug ilhon kinsa ang nagpusil.
Samtang, Cebu City Mayor Tomas Osmeña mohatag og ganti nga P100,000 sa makatudlo sa nagpatay sa matag usa ka kaso nila ni Kalunasan Barangay Konsehal Mabano ug Manal.
Si Osmeña niduaw sa haya sa pangulo sa Barangay Mayor Office (BMO) nga sakop sa BOPK nga si Manal. /