P41.7-M PDAF IPAULI SA COA

Nimando ang Commission on Audit (COA) sa Kapitolyo nga iuli sa panudlanan sa nasudnong kagamhanan ang wa magamit nga Priority Development Assistance Fund (PDAF) gikan pa niadtong 2006 hangtud 2013.

Moabot sa P41.7 milyones ang wa magamit nga PDAF nga naa karon sa panudlanan sa Kapitolyo.

Gikwestiyon usab sa COA ang padayon nga paggamit sa provincial government sa PDAF, bisan og may desisyon na ang Korte Suprema nga nagdili pagamit niini sugod niadtong 2013.

Sa Annual Audit Report (AAR) sa COA niadtong 2013, gitumbok nga may nahibilin nga P89,921,177.39 nga unutilitzed PDAF sa panudlanan sa Kapitolyo.

Apan niadtong Disyembre 2017, anaa na lang sa P41,737,968.66 ang nabilin.

Gikan 2006 hangtud 2013, nagdawatan og PDAF ang Kapitolyo gikan sa pipila ka mga senador ug kongresista alang sa pagpatuman sa pipila ka mga programa.

Tuig 2013, nipakanaog ug desisyon ang Korte Suprema alang sa hingpit na nga pagdili sa pagpagawas sa pundo, may Special Allotment Release Order man kini o wa.

Sa mao usab nga desisyon, gimando nga ipauli ang PDAF sa national treasury.

Sigun sa COA, ang wa pag-uli sa Kapitolyo sa nahibiling pundo sa panudlanan sa nasudnong kagamhanan, nakatampo sa wa pagpatuman sa pipila ka mga priority projects.

Gikwestiyon usab sa COA ang provincial government sa padayong pagamit niini og pondo nga moabot sa P48.5 milyones sa tuig 2014 hangtud 2017, bisan ug gidili na kini sugod 2013. Gibarugan sa COA nga kinahanglang iuli sa kagamhanan sa lalawigan ang nahibiling PDAF nga naa pa sa panudlanan.