Medical mission sa mga molupyo sa hilit nga dapit
Gipdala sa Solid Earth Development Corp. (SEDC) ang usa ka medical mission sa Tubod, hilit nga komunidad sa halayong bukirang bahin sa San Fernando, Cebu, nagtanyag sa lumolupyo og gipangitang medikal nga pagtagad.
Gikahimuot ni Norbeta Canillo ang misyon kay naatiman na sa mga doktor ang taudtaud na’ng dili masabtang kasakit sa ulo ug tiyan sa iyang anak nga si Angelica, 12, human siya natupoka’g bakuna nga publikong gipakatap.
“Dako na kaayo ang among kabalaka tungod sa kanunay nga pagpanakit sa tiyan ug ulo nga giantos sa akong anak sukad nga na-injectionan og Dengvaxia,” siya miasoy.
“Tungod lagi sa among kawad-on, gipainom ra nako (siya) og herbal sama sa mangagaw ug laki nga kapayas,” siya miingon, uban sa pagdugang nga gikalipay niya ang mga bitamina ug pipila ka mga tambal nga hinatag sa mga doktor nga gilauman niyang makapabalik sa kahimsug sa iyang anak.
Nangunay sa pagdumala sa misyon si Hiroyuki Sakakibara, direktor sa SEDC, uban ni Shigeki Koide, luyoluyong pangulo alang sa administrasyon sa Taiheiyo Cement Philippines, Inc. (TCPI) nga miabag sa kalihukan pinaagi sa mga kagamitan ug mga makatabang.
Naatiman sa misyon sa Tubod ang 417 ka mga lumolupyo, 159 nila mga hamtung ug 115 nga mga bata pa, laing 19 nga may dautang ngipon, and 124 nga nakabaton og bagong antipara harun makakita o makabasa na’g tarong, mipahibalo si Mitzie Almira I. Carin, nangulong SEDC division manager.
Siya miingon nga natagad sa misyon ang mga pasyente nga may mga kaso sa altapresyon, artraytis, myalgia (panakit sa kalawasan), sagad nga pagubo ug panip-on, hilanat, panakit sa tiyan ug nukanuka.
Nangunay si Kapitan Teodora E. Canoy sa pag-abag uban sa iyang mga kaubang konsehal sa Tubod, mga health workers, ug mga magtutudlo sa misyon nga sila mapasalamaton kaayo.
Sumala pa si Kathlene Marie P. Gencono, head teacher sa Tubod National High School, dugay na’ng nabatyagan sa mga magtutudlo ang panginahanglanon sa medikal nga pag-atiman sa mga taga-Tubod, ilabina sa ilang mga tinun-an.
“Tataw nga napahigayon sa SEDC ang misyon dili tungod sa pag-aghat sa mga labaw apan sa matinud-anong katuyuan sa mga kawani nga makatabang sa Tubod ug sa ubang mga barangay sa San Fernando,” siya mipadayag.
Lakip sa mga konsehal sa barangay nga mitabang mao sila si Efren Baring, Boena Venturada Paypa, Valerio Canoy, Camelo Sillon, Aquilino Rabadon ug Felix Villasurda.
Moabot na sa 24, 554 ka mga pasyente ang naalagaran sa mga sunod-sunod nga mga medical mission sa SEDC ug TCPI sukad pa sa tuig 2005.