Consolacion nakabawos
Bangis nga gibawsan sa hosts Consolacion Sarok Weavers ang San Francisco, 86-61, sa Game 2 sa miaging gabii aron pagpugos og deciding Game 3 sa North Division finals sa Governor’s Cup 2018 Basketball Tournament sa gitampusisokang Consolacion National High School Gym sa lungsod sa Consolacion.
Nagkanayon si Sarok Weavers coach Delfin Pepito nga determinado ug andam ang tanan niyang mga batos nga makabawos ug maayo ang resulta niini.
Tatawng nadasig sa naglanoglanog nga abiba gikan sa ilang mga sumosunod, ang Sarok Weavers taas og enerhiya sa pagsugod pa lang sa duwa ug wala kini molubad.
Gawas sa ilang nagdilaab nga opensa, ang Sarok Weavers maayo sab nga nakadepensa sa labing pambato sa San Francisco nga si Kenny Rogers Rocacurva.
Gipasabot ni Pepito nga ang pagdepensa kang Rocacurva maoy usa sa ilang gitutokan og maayo sa ilang praktis.
Si Rocacurva, kinsa nagpauwan og 33 puntos sa kadaugan sa San Francisco sa Game 1, nalimitahan lang og 10 puntos ning higayuna.
Naangol sab nuon ang pulso ni Rocacurva sa 2nd quarter hinungdan nga wala kini nakaarte og maayo.
Giangkon ni Pepito nga ang pagkaangol ni Rocacurva nakatabang sab kanila sa pagposte sa dakong kadaugan.
Ang Consolacion gipangulohan ni Emmanuel Villamor pinaagi sa iyang 25 puntos samtang nidugang og 18 puntos si Froiland Maglasang.
Ang Game 3 ipahigayon karong gabii sugod sa alas 7:00 ang takna sa Cebu Coliseum.