Ginikanan sa 4-anyos midangop sa NBI; 4 ka pulis gipaubos sa paraffin test

Kabanay sa 4-anyos nga batang lalake nga napatay atol sa anti-drug operation sa mga pulis sa Carbon Police Station sa Barangay Ermita, dakbayan sa Sugbo, nidangop sa National Bureau of Investigation (NBI) 7 kagahapon.

Gireklamo nila ang mga pulis nga nalambigit sa operasyon ug buot sayran sa pamilya kon kinsa gyud ang nakaigo sa bata.

Pormal nang niduso og reklamo sa NBI 7 ang pamilyang Abatayo batok sa mga sakop sa Carbon Police Station labot sa pagkamatay sa bata nga si Bladen Skyler niadtong Martes sa hapon.

Giingong naigo sa saag nga bala ang bata samtang anaa sulod sa ilang pinuy-anan, samtang nagpahigayon usab sa ilang anti-drug operation sa kasikbit nga balay ang mga pulis.

Matod ni NBI 7 Assistant Regional Director Atty. Dominador Cimafranca, buot sa pamilya nga maklaro kon kinsa ang nakaigo sa bata.

Samtang, ang upat ka mga police sa Carbon station nipaubos na sa paraffin test ug gipa-ballistic exam na usab ang ilang mga armas sa miaging hapon ubos sa pagtugot sa ilang hepe nga si Sr. Insp. John Kareen Escober.

Kini matod ni Supt. Ryan Devaras, hepe sa Investigation and Detective Management Branch, ang gitahasan sa Police Regional Office 7 nga mohimo sa imbestigasyon.

Apan si Devaras niingon nga dili masurprisa kon magpositibo sa gun powder residue ang mga kamot sa upat ka mga pulisa sanglit aduna man silay armas nga kanunay mag firing sa kampo.

Gipasalig ni Devaras sa pamilya nga walay bias ang imbestigasyon ug sa matag resulta sa imbestigasyon, ilang ipahibawo sa pamilya sa batang nakalas.