Kontrata gibawi ni Davide

Gi-terminate ni Gobernador Hilario Davide III ang kontrata alang sa paliton unta nga duha ka sea ambulance sa kagamhanan sa lalawigan sa Sugbo.

Si Jone Sepe, vice chairman sa Bids and Awards Committee sa kagamhanan sa lalawigan sa Sugbo, namahayag nga napakyas ang supplier, Stordal Marine Sales, paghatod sa duha ka sea ambulances sud sa gitakda nila nga panahon hinungdan nga mismo ang Provincial Health Office (PHO) ang nipakansilar sa kontrata.

“So, ang gibuhat sa BAC after receiving that letter from PHO, naghimo og resolution recommending for the rescission of the contract, gipadala nato sa office ni governor atong March 24,” butyag sa opisyal dihang nahinabi sa Superbalita Cebu niadtong Huwebes.

Matod ni Sepe nga gi-penalize nila ang supplier pinaagi sa pagkuha sa performance bond niini.

Apan kini wala pa mahitabo kay maghuwat pa ang BAC sa aksyon nga himuon sa Provincial Legal Office.

Base sa dokumento nga nakita ning mantalaan, nikabat og kapin sa P2 milyones ang performance bond sa Stordal dihang nisalmot sa bidding nga gipahigayon sa BAC alang sa duha ka mga sea ambulance.

“Makabati gyud kay uncompleted contract so mao tong gi-rescind, gi-terminate iyang contract,” sumala ni Sepe base sa kapakyas sa Stordal sa paghatod sa duha ka mga sea ambulance.

Ang opisyal nidugang nga dili na mahimo makasalmot sa bidding alang sa susamang katuyoan ang naasoy nga supplier, apan mahimo kini makaapil sa ubang bidding sa provincial government nga maglambigit og laing proyekto.

Si Dr. Rene Catan, pangu sa PHO, nipadayag og kasagmuyo sa kapakyas sa supplier pag-deliver sa duha ka mga sea ambulance nga matag usa magbalor og P3.5 milyones

Sumala niini nga ikatulo napakyas ang supplier paghatod sa mga sea ambulance. Unang saad niini niadtong Disyembre sa miaging tuig ug nihangyo og ekstensyon niadtong Enero ug nangayo na usab og lugway niadtong Pebrero ning tuiga.

Sigon ni Catan nga iya nang gipabalik sa general fund ang P7 milyones alang sa pagpalit unta sa duha ka mga sea ambulance nga gikan sa pundo sa Provincial Disaster Risk Reduction and Management Office (PDRRMO).

Dugang niya nga mohangyo siya ni Davide nga ipa-supplemental budget kon duna nay mapili nga supplier nga makahimo og sea ambulance.