PERSONAL NGA ATRASO GISUSI SA PULIS SA KASO NI SARZUELO
Personal nga motibo ang usa sa gitutokan karon sa Tabuelan Police Station sa nahitabong pagbanhig patay ni PO1 Avita Sarzuelo samtang sakay kini sa iyang awto paingon sa merkado sa lungsod sa Tabuelan sa milabayng kaadlawon.
Gipakuhaan nag pamahayag sa mga imbestigador sa Tabuelan police ang mga tawo nga nakasaksi sa pagbanhig patay ni Sarzuelo sa may barangay Poblacion.
Matod ni PO2 John Mark Asendiente, information officer sa Tabuelan Police Station, nga nakasugat silag gamay nga problema human ang mga saksi ang mipahibawo nga di nila maklaro ang panagway niadtong upat ka mga lalake tungod sa kangitngit sa atol sa pagpamanhig.
Apan nakatutok sila karon sa personal nga atraso human gireklamo si Sarzuelo sa Tabuelan Police Station niadtong pista sa lungsod nga mipasangil nga gikulata siya sa pulis.
Sa inisyal nga imbestigasyon nga adunay nahitabo nga panagbangi tali sa pulis ug sa iyang kaatbang sa negosyo sa karnehan sa merkado diin nagsugod ang ilang away.
“Nag-iluganay man to sila sa baboy katong usa sad namaligya pud siyag baboy and then gikuha aning atung biktima and then naabot sa punto nga gidapatan sa biktima ang kining ka kompitensya then nag pa-blotter dinhi nga usa pud na sa atong tan-awon,” matod ni Asendiente.
Gipasabot hinuon ni Asendiente nga wa nila wagtanga ang ubang anggulo sama sa giingong kalambigitan niini sa ilegal nga drugas.
Giingong nanganlan usab si Sarzuelo sa usa ka drug personality nga nadakpan sa kapulisan sa lungsod apan wa pa masuta kon ang babayeng pulis ba ang nag-supply kaniya sa ilegal nga drugas.
“Ang atong gibasehan ani katong pagka-relieved niya unya naabot siya sa PHAU. Unya naa pud mi nadakpan diri nga drugs
in which iyaha ning ig-agaw ang permiro and the last iyang pagumangkon naa may gi-divulge ang atuang gi-arrest diri sa drugs na involved iyang pangalan,” dugang ni Asendiente.
Giduso na sa Tabuelan police ang mga kabhang sa bala lakip na ang ubang ebidensya nga nakuha sa crime scene aron pagsuta kon ang mga armas nga gigamit narehistro ba sa PNP.