Kinahanglan manubag
Nag-antos sa kasakit ang pamilyang Abatayo sa kamatayon ni Bladen Skyler, 4, kinsa naigo sa saag nga bala atol sa anti drug operations sa Carbon police station sa Barangay Ermita, dakbayan sa Sugbo niadtong Martes sa hapon. Ang inahan nga si Gwyn Shanieka naa pa sa shock ug kaguol sa kamatayon sa iyang anak. Ang inahan diha sa kwarto dihang naigo si Bladen Skyler sa bala samtang nagtuon sa iyang leksyon.
Nahitabo kini niadtong Martes sa hapon, apan hangtod karon, way bisan usa ka ngalan sa pulis nga nagpahigayon sa operasyon nga nitumaw. Angay unta ipahibawo Cebu City Police Office kinsa kining mga tawhana nga nagpahigayon sa operasyon.
Unta, pinaagi niini, makakita ang publiko, labina ang pamilyang Abatayo, nga dunay gibuhat ang kadagkuan sa kapulisan kalabot sa hitabo kay isip pulis, duna silay tulubagon sa katawhan.
Apan sa dagan karon, igo rang nipahibawo ang kapulisan nga mohinabang sila sa pamilya ug dunay imbestigasyon nga pagahimuon nga gihanigan nang daan nga lehitimo ang ilang operasyon. (Ning pagsuwat, gi-paraffin test na ang upat.)
Niini, klarong nawala sa punto ang kadagkuan sa Cebu City Police Office (CCPO) ug Police Regional Office (PRO) kay way nagkwestyon sa operasyon. Ang angay untang tubagon mao nga, unsa man ang tinud-anay nga nahitabo? Kinsa kining mga pulis?
Kinsa man kadtong pulis nga nagsapnay kang Skyler human sa hitabo ug kinsa ang nagsige og pangayog pasaylo ngadto sa pamilya human sa hitabo?
Aron mawagtang ang pagduda sa publiko nga dunay gitabunan ang kadagkuan sa kapulisan, mas labing maayo nga himuong dayag ang imbestigasyon, di nila gamiton nga hapin ang seguridad sa mga operatiba. Kay ang kaayuhan ug katungod sa katawhan, maoy labing taas kon ang pagpangalagad sa kagamhanan mao nay hisgutan.