Supak ang pamilya

Dear Noy Kulas,

Good day. Itago ra ko sa ngan nga Bert. Mauwaw unta ko mopadala nimo sa akong problema pero I need your advice.

Naa ko magpuyo sa balay sa akong maguwang. Naatol pud nga ang auntie sa akong sister-in-law nga maestra naa magpuyo sa ila kay bag-o rang na-promote sa iyang work ug nabalhin og assign. Maguwang nako ni og 15 years ang auntie sa akong bayaw.

Wa ko mag-expect nga magka friend mi kay taas siya og ranggo sa ilang company. Pero bisan edaran na siya, sexy gihapon kaayo siya kay maayo mogalam og lawas. Magkuyog na mi sa pagpanuroy ug bisan unsa kay dalaga pa man siya bisan almost 50 na siya.

Nagkauyab mi bisan sa among age gap, pero pwerteng sukoa sa akong bayaw ug sa akong maguwang pagkahibawo nila. Ila kong gipalayas sa ilang balay mao nga naglain na lang ko. Ang pamilya sa akong uyab supak kaayo kay lagi kuno, di mi pareho og level ug edaran na siya. Ang akong uyab nakigbuwag na nako tungod sa pressure sa family. Ako di unta gusto kay wa ko mag mind pero di na siya gusto og gubot.

Unsa kahay akong buhaton aron akong ma convince ang akong uyab? Mahimo ba diay nga makababag ang pamilya niya? Ready kaayo ko mopakasal niya kon gusto siya.

BERT

Bert,

Sama sa uban nga naa sa samang sitwasyon nimo, moingon ko nga naa ra ninyong duha unta ang desisyon. Di na baya mo mga bata o batan-on nga pagabut-an ang relasyon sa ubang mga tawo. No wonder nga sa iyang edad, nagpabilin siyang dalaga kay basin apil siya sa pipila ka mga babaye nga mag-agad sa pamilya.

Respetuhi ang iyang desisyon. Kon di siya gusto og gubot tali sa iyang pamilya, ayaw siya pugsa sa pagpadayon sa inyong relasyon. Kinahanglan mo move-on ka na. Kay seguradong di siya magmalipayon uban kanimo kon ang iyang pamilya wa makauyon. Sakit man tuod, apan dawata nga mao kini ang sitwasyon.

NOY KULAS