Please be good to me
Kalit kong nahunahuna si Arnel. Kon magpahatod ko kang Samuel sa among lugar, na, kon makita siya ni Arnel kasuk-an gyud siya. Nasabtan man nako ba nga nakagusto si Arnel nako. Klaro kaayo sa iyang mga lihok nga gipakita nako ug sa iyang mga sinultihan nako. Angay gyud kong mabalaka kay pagka maldito ug pagka barumbado ra ba ni Armel uban sa iyang mga barkada.
Nahadlok ko nga tabangan si Samuel sa pagbun-og nila ni Arnel.
“A-Ayaw na lang, Sam. Salamat na lang.”
“Ayaw ko balibari, Reen. Gusto sab kong makatultol sa inyo.”
Nahilom ko. Mitungha sa akong hunahuna nga kay namugos man gyud si Samuel, ako na lang siya paundayonan. Mopatuo sab tingali si Arnel nako kon akong badlungon sa higayon nga pasakitan nila si Samuel.
“Aw, sige.”
Mao ra kini ang akong nasulti.
Wa mi tingug-tingog si Samuel nga nagtupad paglingkod sa diyip nga among gisakyan.
Naghunahuna ko kon unsa gyud kahay mahitabo nga makita ni Arnel si Samuel nga akong gikakuyog sa pagpauli nako?
Mikanaog kog una dihang gipahunong ko ang dyip nga among gisakyan pag-abot na sa eskina nga mao gyuy akong kanaogan ug maglakaw lang kog gamay paingon sa among balay. Dihang milarga na ang dyip, mitan-aw ko sa palibot. Wa gyud ko masayop. Diha sa gawas sa tindahan si Arnel uban sa tulo niya ka mga barkada. Apan ning higayona, wa koy nakita nga ilimnong makahubog sa ilang atubangan.
Milagro nga wa mag-inom sila si Arnel ug mga kauban? Hilom kong nakaingon.
Gitutokan ni Arnel si Samuel. Gikulbaan ko pag-ayo kay mitindog si Arnel ug miduol namo ni Samuel. Nagpabilin ang tulo niya ka barkada sa ilang gilingkoran. Kusog nga nagbutuk-butok ang akong dughan. Apan nahuwasan ko sa kakuyaw kay nag-smile man si Arnel pag-abot niya sa among atubangan ni Samuel.
“Good afternoon ninyo, Reen.”
“M-Maayong hapon sab, Nel. Si Samuel ning akong kuyog, Nel.”
Miyangu-yango si Arnel nga mitan-aw pag-ayo kang Samuel. Unya gipaila ko sab si Arnel kang Samuel. Naglamanohay sila. “Adto na mi, ha, Nel?” Hapit di makagawas ang akong tingog kay seryuso kaayo si Arnel nga nagtan-aw kang Samuel.
Igo lang mitando si Arnel. (SUMPAYAN)