Magis Eagles gipanglupig sa LCC Bacolod
Gipangbuntog sa bisitang La Consolacion College (LCC) ang hosts Sacred Heart School-Ateneo de Cebu (SHS-AdC) Magis Eagles, 89-85, sa miaging gabii sa pagsugod sa 2018 Magis Eagles Basketball Invitational League sa Lux Oriens Gym sa SHS-Ateneo
de Cebu sa Canduman, Mandaue City.
Ang LCC, usa ka college squad gikan sa Bacolod City, kanunay nga naggukod sa 1st half. Nabiyaan sila og lima ka mga puntos sa halftime, 32-37.
Apan ang LCC kalit lang mingsulbong sa 2nd half pinaagi sa pagpabuto og sunodsunod nga three-point shots nga maoy naghatag kanila og 58-51 nga labaw.
Ang Magis Eagles, nga usa sa lig-ong high schools teams sa Cebu Schools Athletic Foundation Inc. (CESAFI), mingpakapakapa og balik sa ilang opensa aron tablahon ang duwa, 62-62, sa dayong pagsulod sa 4th quarter.
Human niini, nagpulipuli pagpasutoy sa ilang opensa ang duha ka mga kampo hinungdan nga sa nahabiling kapin sa duha ka mga minutos, nagtabla na sila, 84-84.
Dihang nakamugna og duha ka turnovers ang Magis Eagles, ang LCC wala mag-usik og panahon ug ilaha kining gipahimuslan aron irehistro ang upat ka mga puntos nga kadaugan.
Si Lubert Magaspar mipabuhagay og 23 puntos aron pangulohan ang LCC, miamot og 14 puntos si Sudayan samtang nidugang og 11 puntos si Articulo.
Ang Magis Eagles gipangulohan ni Michael Cutamora pinaai sa iyang 16 puntos samtang nitampo og 10 puntos matag usa sila si Mesina ug Casnillo.
Sa second game, gilupig sa Consolacion Sarok ang University of Negros Occidental-Recoletos (UNO-R), 82-80, pinaagi sa nakapadaog nga puntos ni Travis Mantua sa nahabiling upat ka mga segundos.
Ang torneyo, nga gisupoitahan sa Boynin Marketing, Gaab Airconditioning, Chen Apparels ug Ligo Sardines, tipik sa preparasyon sa Magis Eagles alang sa 2018 CESAFI. /