Kaso ni Mabatid, laing 8 gibasura

Gibasura sa Municipal Trial Court in Cities (MTCC) ang election protest nga gisangat ni Daniel Arguedo batok ni Kapitan Niña Mabatid sa Barangay Mabolo, Cebu City ug laing walo ka tawo.

Si Arguedo, kinsa kaalyado sa Bando Osmeña Pundok Kauswagan (BOPK), maoy gipilde ni Mabatid sa nakalabay nga barangay ug Sangguniang Kabataan (SK) elections.

Niadtong Mayo 24, ang grupo ni Arguedo ug laing pito ka mga nagpapili nga konsehal sa barangay nipasaka og protesta sa Municipal Trial Court in Cities (MTCC) sa alegasyon nga ang grupo ni Mabatid namalit og boto.

Ang mga protestant niduso og mga affidavit sa witness sa giingong lapad nga pinalitay og boto ug ilang giampo nga madeklara ang mga protestee nga guilty sa vote buying, ma-annul ang ilang proklamasyon ug madeklara nga winner ang mga protestant.

Apan sa pagtimbangtimbang ni MTCC Judge Monalila Tecson, walay igo nga ebedinsya ang reklamo sa kampo ni Arguedo aron mahatag ang ilang gipangamuyo.

“After careful and judicial evaluation of the Petition and it’s attachments, this Court finds the instant Protest insufficient in both form and substance,” tipik sa hukom sa huwes.

Ang mga alegasyon ug affidavit sa mga eyewitness ug ubang ebedinsya nga giduso sa kampo ni Arguedo napakyas pagkumbinse sa korte.

“Wherefore, due to insufficiency in both form and substance the instant Protest dated 24 May 2018 of Protestants Daniel Francis Arguedo et. al. Against Protestees Prisca Niña Mabatid et. al. Comelec and DILG of Region VII is hereby ordered dismissed,” hukom ni ni Tecson.

Si Mabatid nagkanayon nga aduna siyay kasalingan nga tinubdan kon kinsay nag-ingon nga si Mayor Tomas Osmeña ang nagpaluyo sa election protest nga gisang-at sa grupo ni Arguedo sanglit iya kining kaalyado.

Matod ni Mabatid nga si Arguedo ang gihimo nga pangulo sa giumol nga Barangay Mayor’s Office (BMO) diha sa iyang barangay.

Gihulagway sa bag-ong kapitan sa Mabolo nga bisan kon gi-free zone sa BOPK ang Mabolo apan didto nakapusta ang mga Osmeña kang Arguedo sanglit si Konsehal Margot nga asawa ni Tomas sa wala pay kampanya, didto naguban uban sa kampo sa iyang kontra.

Si Mabatid wala makatuo nga biyaan siya sa BOPK taliwa sa suporta nga iyang gihatag ngadto sa grupo aron lang modaog sa nakalabay nga 2016 eleksyons.