BAC sa Kapitolyo mag-bidding og balik pagkuha og ad agency
Mopahigayon og laing bidding ang Bids and Awards Committee (BAC) sa kagamhanan sa lalawigan sa Sugbo alang sa pag-hire og advertising agency nga maoy mo-produce og radio advertisements kabahin sa mga programa ug proyekto sa Kapitolyo.
Ang Kapitolyo naggahin og P3.2 milyones alang niini.
Si Jone Siegfred Sepe, pangu sa Provincial General Services Office (PGSO) ug vice chairman sa BAC sa Kapitolyo, nibutyag nga ablihan og balik ang bidding sa Agusto 1 sa alas 10 sa buntag sa BAC Conference Room sa ground floor sa Capitol Building.
Apan sa dili pa ang pag-abli sa bidding, mohimo una sila og prebid conference sa alas 2 sa hapon sa Hulyo 20 sa samang lugar.
Base sa invitation to bid nga gi-post sa opisyal nga website sa provincial government, ang modaug nga bidder kinahanglan nga mo-produce og 15 ka spots nga tag 10 minutos sa matag spot sa matag adlaw, gikan sa alas 8 sa buntag hangtod sa 8:30 sa buntag, nga radio advertisement alang sa mga impormasyon kabahin sa mga programa, proyekto ug mga kalihokan sa lalawigan sa Sugbo.
Ang paghatod sa broadcasting services ihatod sa matag Huwebes sa semana ug gipaabot nga makumpleto sud sa upat ka buwan gikan sa pagsugod.
Kinahanglan usab ang mga bidder kay makakumpleto sud sa duha ka tuig gikan sa petsa sa pagduso ug pagdawat sa bids, usa ka kontrata sa sama nga proyekto.
Ang bidding ipahigayon pinaagi sa open competitive bidding procedures gamit ang non-discretionary “pass/fail” criterion nga maoy nalatid sa Revised Implementing Rules and Regulations (IRR) sa Republic Act 9184 niadtong 2016 kun Government Procurement Reform Act.
Niadtong Mayo gibuksan sa BAC ang unang bidding alang sa maong katuyoan, apan way nibid nga advertising agency.