Minos pa ang mikuha og license plates: LTO 7
Sukad gipahibawo sa Land Transportation Office (LTO) 7 nga mamahimo nang makuha ang mga plate number sa motorsiklo nga narehistro niadtong Hulyo hangtod Disyembre 2016, wala pa makaabot sa usa ka libo ang nikuha niini.
Tungod niini, giawhag mismo sa regional director sa LTO 7 Victor Caindec nga kuhaon na kini sa mga tag-iya pinaagi sa ilang mga dealer.
“We agreed that the process will be thru the dealers kay tungod ang mga dealer naa man sila’y contact unta, kami wa man mi kontak sa mga tag-iya. Apan ang mga dealer nagpatabang sad nato sa LTO nga kon mahimo nga ipa-remind ang mga vehicle owner nga palihug intawn adto mo sa inyong mga dealers para ma-execute ninyo ang SPA, para makuha nila ilang plate numbers diri namo,” si Caindec nagkanayon.
Dugang niini nga mag-andam lang ang tag-iya nga naghuwat sa ilang plate number og special power of attorney aron makuha na sa dealer ang plaka unya mataod na kini sa mga sakyanan.
Sa labing uwahi nga datus ni Caindec, wala pa niabot sa usa ka libo ang nikuha niining mga plaka nga naabot na sa Sugbo.
Gikataho nga moabot sa 18,000 ka plate numbers ang backlogs sa LTO 7 alang sa motor vehicle plates.
Giklaro usab sa director nga dili siya gusto nga maabot ang panahon nga manakop sila tungod kay wala pa’y plaka ang sakyanan. Dili siya mohatag og timeline kon hangtod kanus-a pwede makuha ang mga plaka sa mga sakyanan.
Hangyo niini sa mga tag-iya nga tabangan sila nga unta moduol kini sa ilang gipalitan nga mga sakyanan aron makuha sa dealers ang plaka ug mataod na kini.
Dugang ni Caindec nga ang ilang Central Office sige na ang pagpa-imprinta sa mga plaka ug kada duha ka semana, aduna’y maabot diin nagtipun-og na kini karon sa ilang rehiyonal nga buhatan.
Posible usab nga karong tuiga, aduna na’y petsa kon kanus-a mahimo makuha ang mga plaka nga narehistro sa Enero hangtod Disyembre sa 2017.