Mahiusa sa sports

Dungan molukso, mosinggit sa kadaugan. Parehong masakitan o mohilak sa kapildihan. Bisan kontra sa pulitika, namatikdan nga daklit nga magkahiusa ang mga Pinoy sa sports o paugnat-sa-kusog labi na sa paglaban sa mga magduduwa sa nasod sa internasyonal nga hawanan sa panagtigi.

Susama sa ulahing kadaugan ni Senador Manny Pacquiao nga nisakmit sa World Boxing Association (WBA) welterweight title batok kang Lucas Matthysse nga gipalukapa sa Pambansang Kamao sa ikapitong hugna sa ilang away sa Kuala Lumpur, Malaysia kagahapon.

Mao kini basihanan sa atong su yot nga mas palambuon ang prgrama sa sports sa nasod aron motunhay ang natural nga kahiusahan ug malungtaron isip lig-ong pundasyon sa nasudnong kalamboan.

Si Pacquiao ug ubang kampiyon sa paugnat-sa-kusog giisip nga imahen sa kahiusahan ug kalinaw human way kriminalidad nga natala panahon sa away o duwa. Sila ang bag-ong nasudnong bayani ug idolo sa pagpaningkamot. Dili babag ang kalisdan apan hagit sa pagbugtaw sa tingusbawan sa kinabuhi,

Si Sen Pacquiao, ang Pambansang Kamao, ug ang ubang kampiyon nga atletang Pinoy nahimong inspirasyon sa nagtubo nga mga batan-on, uban sa paghatag og leksiyon nga ang dagan sa ilang karera nga dili tanan kalipay apan usa ka serye sa pagkalukapa ug pagbangon.

Ang kadaugan ni Pacquiao, 39-anyos, kagahapon nisunod kini human napildi sa Australian Jeff Horn sa Brisbane, Australia sa miaging tuig.

Dihang gipalukapa ni Pacman si Matthysse sa ikapitong hugna, ang Filipino sa tanang asang suok sa kalibotan nagmaya sa laing garbo sa Pambasang kamao nga nag-inusara sa kalibotan nga usa ka kasamtangang senador ug aktibong boksidor. Pacman, simbolo sa kahiusahan!