Please be good to me

Kon sabton gyud, angay ko pang hatagan og igong panahon si Samuel. Apan nahunahuna nako nga kon buhaton ko kini, parehas ra nga gipalaom ko siya.

May nang mentras di pa kini mahitabo, sultihan ko na siya sa tinuod.

“Kining, Sam, you know gyud since kaniadto sa pangulitawo nimo nako nga nagpakita na ko nimo nga inigsuon lang ang akong pagtan-aw nimo. Gisuwayan kog tudlo ang akong kaugalingon nga higugmaon ka. But I’m really sorry, Sam.”

Nakapanghupaw si Samuel. Nasabtan ko niya.

“Sakit man gyud, uy, Reen. But mao may imong desisyon. Dawaton ko ni sa kinasingkasing.”

Mikarat ang tutunlan ni Samuel. Morag kahilakon siya apan nagpugong lang tingali siya nga di manglugmaw ang iyang mga luha.”

“Salamat, Sam, nga hisabtan ko nimo.”

Wa na magdugay si Samuel, mipauli na siya. apan sa wa pa siya mogawas sa balay, naglamanohay mi. Nagkasabot mi nga friend na lang gyud ang among pagtagad sa usag usa.

Sa misunod nga mga adlaw ug gabii, wa na magsamok si Samuel nako. Gidawat na gyud tingali niya ang pagpakyas ko sa iyang gugma. Aw, siya ra man sab ang nag-ingon nga di pangayuon ang gugma kondi ipitik kini sa kasingkasing? Wa man gyud mopitik sa paghigugma ang akong kasingkasing ngadto niya.

Usa ka hapon, nag-uwan ug wa na sab ko makadalag payong. Pagkanaog ko sa gisakyan kong dyip pag-abot sa eskina, gisugat ko ni Arnel. Gipayongan dayon ko niya.

“Salamat, ha, Nel. Pero nahasol nuon ka.”

Mi-smile ko kay nindot kaayog pahiyom si Arnel nako.

“Unsa guy nahasol? Wa ko mahasol, uy, Reen. Concern lang gyud ko sa akong love.”

“Love?”

Samtang naglakaw mi si Arnel, mikupot siya sa akong kamot. Nagkatinan-away mi.

“Yes, Reen. Love. kaniadto pa kong nakagusto nimo pero nagpugong lang gyud ko sa pagpadayag ani nimo kay nakaila man ka nako nga burukinto nga pagka tawo ug kanunay makakitag away dinhi sa ato. Gawas pa, nakahibawo sab ka nga wa ko magtarong sa pag-eskuwela. Pero karon nga nausab na ko ug nagtinarong na sa pag-eskuwela, gidaygan na tika sa akong gugma.”

Wa ko kuhaa ang akong kamot nga gikuptan ni Arnel. Niadtong tungora, gisugot ko siya.

(KATAPUSAN)