4 TIPI SA 2 KA AMBUSH
BARANGAY KONSEHAL, 3 KA PINIRISO GI-TARGET
MGA AMBUSH: Unang gi-ambush mao si (tuo) Lagtang barangay konsehal Stephen Bas, 23, tinun-an sa engineering sa usa ka unibersidad mga alas 8 sa buntag kagahapon sa South Coastal Road sa Barangay Cansojong sa dakbayan sa Talisay. Mga usa ka oras kapin ang nakalabay, gi-ambush usab ang usa ka sakyanan (wala)sa Bureau of Jail Management and Penology (BJMP) nga gisakyan sa tulo ka mga piniriso sa may Barangay Maghaway sa samang siyudad. Ang tulo patay diha-diha.
Upat ang patay sa duha ka managlahing mga ambush nga naggintang lang og oras kagahapon sa buntag sa dakbayan sa Talisay.
Nagkapuliki ang kapulisan sa Talisay kay wa pa gani sila mahuman sa pagsusi sa unang hitabo, gisundan kini sa laing ambush.
Unang gi-ambush patay sa wa mailhing riding in tandem sa may South Coastal Road sa Sitio Bihonan, Barangay Cansojong, Talisay, pasado alas 8 sa buntag mao si Art Stephen Bas, 25, graduating student sa kurso nga mechanical engineering, usa ka kagawad sa Barangay Langtad sa samang dakbayan.
Alas 8:15 sa buntag, ang Talisay Police station nakadawat og tawag sa telepono gikan sa usa ka concerned citizen nga nagpahibawo nga adunay insidente sa pagpamusil sa dapit.
Sa inisyal nga imbistigasyon, si Bas nagmaniho sa Ford Everest kolor puti padulong sa Cebu City.
Gitung-an siya sa duha ka mga motorsiklo nga adunay angkas.
Ang driver sa usa ka motorsiklo nikanaug, nipusil sa driver’s side sa makadaghan.
Dihang nahutdan kini sa bala, ni-load pa kini sa laing magazine ug namusil na sab sa laing pikas sa sakyanan.
Usa ka saksi sa hitabo nihulagway sa gunman nga nagsul-ob og itom nga jersey ug puwa nga kawo, adunay tattoo sa iyang bukton.
Nagmaneho kini sa itom nga XRM nga motorsiklo, apan nagpasalba sa wa pa mopalayo sa dapit. Gibana-banang nagpanuigon kini og mga 40 anyos.
Nakuha sa Scene of the Crime Operatives (SOCO) gikan sa dapit ang 13 ka mga basiyo sa bala nga gamiton sa ballistics examination.
Ang igsuon sa biktima nga si Arthuro Bas nga nahinabi sa Superbalita Cebu niingon nga si Stephen padulong na unta mo duty sa iyang on-the-Job training (OJT) sa Cebu City.
Dugang pa niya nga way problema ang iyang igsuon nga iyang gihulagway nga buotan.
Si Talisay City Mayor Eduardo Gullas nipadangat sa iyang simpatiya ngadto sa pamilya.
“I strongly condemn this killing of Barangay Lagtang Counselor Art Stephen Bas. It is my hope that the police can solve it immediately,” matod pa sa mayor. Nanawagan sab ang pamilya sa biktima sa kapulisan alang sa hustisya.
“We call on the local and national government to please help our family find justice for his death. We ask the authorities to find all possible leads and bring the assailants to court that they may answer for the crime they have committed and they can be punished,” tipik sa pamahayag sa pamilya.
Ila usab nga giawhag ang publiko nga di dayon mohukom kay si Stephen usa ka maayong tawo.
LAING AMBUSH
Paglabay og usa ka oras, ang sakyanan sa Bureau of Jail Management and Penology (BJMP) matod pa gi-ambush sa labing minos 14 ka mga tawo.
Namatay ang tulo ka mga piniriso sa giingong ambush unahan sa Talisay City Jail sa Barangay Maghaway, dakbayan sa Talisay.
Ang mga namatay giila sa kapulisan nga mao sila si Yayam Gabiola, 41; Marwin Abelgas, 28; ug Jovencio Rabadon, 36.
Ang tulo gilambigit sa drugas sa jail.
Matod ni Talisay City Acting Police Chief Marlu Palomaria Conag nga ang mga piniriso padulong sa Talisay City Municipal Trial Court aron motambong sa hearing sa ilang mga kaso.
Apan gi-ambush sa gibana-banang 14 ka mga tawo nga sakay sa pito ka mga motorsiklo, matod ni Conag.
Pag-abot sa dapit nga awaaw, usa ka motorsiklo nga natumba sa dalan hinungdan nga nipamenor ang driver. Kalit lang namusil ang duha nga sakay sa pag-agi sa ilang sakyanan.
Ang mga Jail officer nga sila si JO3 Clay Gutierrez ug JO2 Eran Marquita gipusil usab, apan naluwas tungod kay nakasuot og bullet proof vest.
Nipasutoy unta sa pagpadagan ang drayber, apan kalit nga nanggawas ang unom ka mga motorsiklo nga dunay tagduha nga sakay.
Gibabagan sila ug gipangtionan hinungdan nga ang duha ka jail officers way nahimo.
Gikuhaan silang duha sa ilang mga armas. Ang tulo ka mga piniriso girakrakan gilayon sa mga mamumuno.
Ang mga biktima naigo makadaghan nga higayun sa lawas, dali pa unta nga gidala sa Talisay City District Hospital apan gideklarar nang patay. /