Panagsogod Festival
Samtang naniudto mi si Efren, di gyud nako kalikayan nga makatan-aw niya. Unya kon motan-aw sab siya nako, magpahiyomay mi.
“Laming pagkaluto ning kalderetas nga kanding, Loida.”
Nalipay ko sa pagdayeg ni Efren. Nasabtan nako nga nakagusto gyud siya sa sud-an nga iyang gikaon.
“Si Papa gyud ang nagluto ani, Fren. Anad na siya sa paglutog kalderetas nga kanding. Di kay kanding lang, lami sab siyang molutog humba, inatayan ug uban pang mga potahe.” Miyangu-yango si Efren.
Malipayon kaayo ko niadtong tungora. Morag di na ko gusto pa nga mahimuwag si Efren nako. Apan nakahibawo ko nga may limitasyon lamang ang among panag-uban karon. Igo na lang kong nangandoy nga makahibalag unta kog lalaki nga parehas kang Efren nga makapapitik sa akong kasingkasing. Bisag hilom kong nahigugma kaniya apan wa gyud koy plano nga ilugon siya kang Susette.
Amiga mi si Susette ug di ko gusto nga masuko siya nako. “Salamat, ha, Loida.” Nakahuman na mig pangaon si Efren. Nahikatawa ko.
“Unsay salamat? Pista ron, Fren. Ang taga dinhi naghikay aron ipakaon sa mga bisita.” “Bitaw, no.” Nagkinataw-anay mi si Efren. Hilom kong gisakitan kay nahunahuna nako kon nganong si Efren pa man gyud ang akong gihigugma nga duna na may nakatag-iya niya nga friend nako? Mao lagi gyud kuno ning gugma, uy, magpatuyang lag dasmag. Nakapanglingo ko. Tinuod gyud kay nahitabo man kini nako ron.
Nahunong ang among pag-estorya ni Efren kay mitingog ang iyang selpon. Usa kini ka tawag. Nagpaminaw lang ko dihang gitubag na ni Efren ang nagtawag niya.
“Nakapaniudto na man ko, Susette. Dia ko ron sa ilang Loida.”
Di ko madungog ang gisulti ni Susette, tingali nasuko siya, o kaha nangabubho nako. Nagpadayon ko sa pagpaminaw sa gisulti ni Efren.
“Moapas mo diri? Ayaw na lang kay moanha na man ko.”
Gusto ko untang hawiran si Efren dihang nananghid na siya nako pagkahuman nilag panagsulti ni Susette sa selpon. Apan nagpugong lang ko sa akong gusto kay basig magaway na nuon sila si Efren ug Susette tungod nako.
Gibati ko ang kamingaw dihang mibiya na si Efren sa among balay. Kaayo na gyung ihilak, uy. Nakaingon ko sa hilom. (SUMPAYAN)