DIRIYOT DIAY MA-CANCEL
Pacquiao naa’y poblema sa kasingkasing
Lima ka mga adlaw human niya gipaundang sa 7th round si Lucas Matthysse aron ilugon ang World Boxing Association (WBA) welterweight title, gibutyag ni Manny Pacquiao nga nakasugat siya og problema sa kasingkasing nga posible untang makapauswag o makapakanselar sa ilang away.
Sa taho sa Spin.ph, gitug-an sa Pambansang Kamao sa Pilipinas nga usa ka adlaw sa wala pa siya migikan paingon sa Kuala Lumpur, Malaysia, nahidangat siya sa ospital gumikan kay maglisod siya sa pagginhawa.
Nasayran nga ang 39 anyos nga boxing icon nakasinati og inborn heart problem hinungdan nga misugyot ang mga doktor sa Cardinal Santos Hospital nga iuswag ang away nila ni Pacquiao ug Matthysse.
Matod ni Aquiles Zonio, Press Information Officer (PIO) ni Pacquiao, nga mismong ang 8-division world champion ang mipasalig sa mga doktor nga naa ra siya sa saktong kondisyon ug misaad nga dag-on niya ang away.
Nagkanayon si Zonio nga niadtong Hulyo 8, nag-emergency flight si Pacquiao gikan sa General Santos City paingon sa Manila ug mideretso kini sa ospital aron ipasusi ang iyang kondisyon.
Lima ra ka mga sakop sa Team Pacquiao ang nakasaksi niini. Ang asawa ni Pacquiao ug mga anak nag-una nang daan paglarga sa Malaysia.
Sa ospital, gipaubos si Pacquiao sa angiogram procedure diin nabatyagan ang sakit sa iyang kasingkasing.
Gipadagan si Pacquiao sa thread mill unya gipaubos sa ECG ug maayo ra ang resulta niini.
Apan nabalaka gihapon ang mga doktor hinungdan nga gipirma una nila og waiver si Pacquiao una kini nila gitugotan nga makagawas sa ospital.
“Noong nagpa-ECG tayo, parang may nakita sa result ng ECG na nagkaproblema, so nag-make sure lang ‘yung doktor na walang problem kaya nag-undergo ako ng angiogram,” pasabot ni Pacquiao.
“Pagtingin nila, wala mang problema.”
Nakapasar ra sab si Pacquiao sa tanang medical tests hinungdan nga nadayon kini paglarga siya sa Malaysia.
“Hindi alam ng lahat ng team na nag-undergo ako,” batbat ni Paacquiao.