Mabatid 'gihulga', nangayog police escort

Kapitan sa barangay Mabolo nagpa blotter sa Mabolo police station human makadawat og hulga sa kinabuhi pinaagi sa text message sa cell phone.

Kapulisan mohimo og threat assessment alang sa paghatag og security kang Kapitan Niña Mabatid, apan Police Regional Office 7 andam na mohatag og duha ka personnel aron mobantay kaniya.

Apan si PRO 7 Director Debold Sinas nakugang sa giingong 20 ka personnel sa PNP nga gipangayo ni Mabatid nga mobantay kaniya.

Giangkon sa hepe sa Mabolo police station Senior Inspector Dindo Juanito Alaras nga sa milabay nga gabii, nagpa blotter si Mabatid pinaagi sa iyang representante ug administrator human makadawat og hulga sa kinabuhi pinaagi sa text.

Matod ni Alaras nga gipakita sa tawo ni Mabatid ang text message nga naghulga sa kinabuhi sa kapitan nga nakapahadlok na sa maong barangay official.

Tungod niini ipaubos nila sa imbestigasyon pinaagi unya sa abag sa PNP Cyber Crime Group-7 kon ila ba nga masubay kinsa ang nagpadala sa hulga nga mensahe o kon aduna bay kalabutan ang politika.

Gipakita sa tawo ni Mabatid ang text message nga gihulagway niya nga pagpanghulga nga gi screen shot na sa cellular phone niini.

Ang maong mensahe nagkanayon “Mamatid!(Mabatid) Kaabot pa kaha ka sa elektion? Kinsa imong gisaligan? Isog ra ka no,”tipik sa text message nga nadawat ni Mabatid.

Nipahibawo pa ang sender nga nasayod siya asa nagtungha ang mga anak ni Mabatid.

Nunot sa hulga, gipa-robingan na sa patrol car sa Mabolo police matag karon ug unya ang barangay hall kon naa si Mabatid aron kaproteksyonan.

Sa pagkakaron, wa pa mohatag og personnel ang Mabolo PNP isip police security alang sa kapitan sanglit wa pa usab kini pormal nga nangayo kanila.

Una nang mibutyag si Mabatid nga gipasaligan siya sa Malacañang nga hatagan kinig 20 ka PNP personnel tungod sa nadawat niyang hulga.

Apan si Sinas mihimakak nga ang PNP mohatag sa maong gidaghanon sa personnel sa kontrobesyal nga kapitan sanglit daghan ra kini.

“Twenty ka tawo? Asa man ta mangita og pulis nga 20? Ang among policy is duha ra,” tipik sa pamahayag ni Sinas atol sa turn over ceremony sa Lapu-Lapu City Police Office kagahapon sa buntag nunot sa pagkapupos sa two-year assignment ni Senior Supt. Rommel Cabagnot.