Luwas ang Sugbo, Bohol alang sa mga turista nga mobisita niini

Bisan paman og wa pa gilibkas sa nagkadaiyang nasod ang travel ban niini sa ilang mga turista sa habagatang Sugbo ug Bohol, gipahibawo sa Armed Forces of the Philippines (AFP)-Central Command nga luwas kini ilabi na nga daghang tourist sites sa maong mga dapit.

Kahinumduman nga sugod niadtong nakalabay nga tuig, dihang niluwat og travel advisory ang United Kingdom ug United States kabahin sa pagdi una sa ilang mga citizen nga mobisita sa habagatang Sugbo ug Bohol.

Kini tungod sa giingon sa presensiya sa terorista sa maong mga naasaoy nga lugar nga mangidnap og turista.

Apan si Colonel Ignacio Madriaga, commander sa 302nd Infantry Brigade, diin nasakop ang Sugbo ug Bohol, nihulagway nga luwas ang maong mga dapit.

Nihatag pa gani kini og 8.5 porsiyento nga rating sa kaluwas sa area of responsibility niini diin 10 mao ang highest.

Dugang niini nga di maabot og minilyon ang bisita sa Central Visayas ilabi na sa Sugbo ug Bohol kon di pa kini luwas.

Nagtuo usab siya nga ang mga turista mismo ang di motuo sa tagsa-tagsa ka mga travel advisory sa ilang nasod tungod kay nakita ug nadungog usab nila gikan sa ilang mga kalahi nga luwas ra nga biyahean ang mga dapit.

Nihulagway usab kini nga sila sa AFP, naningkamot nga magpabilin nga luwas ang ilahang area of responsibility (AOR), ilabi na sa mga dapit nga adunay daghang turista.

Sa habagatang Sugbo, adunay mga tourist police ang gipang-deploy aron maseguro nga luwas ang turista.