Luyo sa SONA

Hangtod karon, seguradong gihisgotan ang mga kasikas ug drama sa pagpahigayon sa ikatulong State of the Nation Address (SONA) ni Presidente Rodrigo Duterte sa Batasang Pambansa Complex sa dakbayan sa Quezon niadtong Lunes sa hapon. Una, ang pagkalangay og kapin sa oras sa pagsugod sa SONA aron pagresulbar sa pagtumaw sa duha ka speakers sa Ubos Balay-Balauranan. Nihimo og dinaliang managlahi nga tigom si Duterte sa kampo ni Speaker Pantaleon Alvarez ug kampo ni Gloria Macapagal Arroyo.

Nasulbad nga si Alvarez maoy mouban sa plenaryo sa SONA. Apan sa mubo ug talagsaong kaseryuso sa pakigpusong ni Duterte, ang mga kongresista nibalik sa ilang sisyon ug gikompirmar og balik sa botasyon sa pagkalagpot ni Alvarez ug si Arroyo maoy bag-ong speaker sa House.

Sa gawas sa Batasang Pambansa makita ang daghang tawo. Dunay pro ug anti-Duterte. Gatosan ka mga pulis nga andam kon dunay kagubot nga motumaw. Salamat sa Kahitas-an human malinawon ang protesta. walay bayolenteng nahitabo. Apan saba kaayo ug puno sa propaganda ang mga walhong pundok uban sa grupong nagpabana.

Hinuon, dili kita makurat sa estilo sa mga walhon nga saba. Walay kabag-ohan sa templitado nilang kalihokan sa matag SONA gikan pa sa adminisrtasyon ni anhing Presidente Corazon Aquino ug hangtod sa kasamtangang administrasyon. Walay kausaban sa isyu, walay epekto ang ilang protesta? Dunay panultion nga nag-ingon, “Ang sapa nga saba, mabaw apan ang sapa nga hilom lawom.’’ Naghilom lang ang mayoriya nga pabor sa programa sa kagamhanan.

Ang mga panghitabo luyo sa Sona niadtong Lunes hulagway sa demokrasya sa nasod diin ang tanan dunay kagawasan sa pagpadayag sa gibati ug palihok sa publikong dapit Bisan sumo nang tan-awon sa uban o nagbalikbalik ang isyung gidala, importante ang papel sa mga walhon sa pagbalanse sa gahom.