We don’t talk anymore

Wa koy kalinaw sa among relasyon ni Gerald. Pulos konsumisyon ang akong giantos niya. Kanunay siyang makig-date sa lain-laing mga babaye, nga ang angay unta ako ra ang hatagan niyag dakong pagtagad sa iyang kinabuhi.

“Ikaw ra say mabasol aning tanan, Sheen.”

Nakalingi ko. Si Dizza ang akong nakita nga natindog sa akong luyo. Miginhawa kog lawom unya namahid ko sa akong mga luha sa akong palad. Mitapad paglingkod si Dizza nako.

“Unsa may imong laoman kang Gerald, nga magbinuotan siya ug mag-stick to one na siya nimo? Wa siya mosaad nimo nga ikaw lang ang iyang higugmaon kon sugton mo siya. Wa siya moingon nimo nga magbinuotan na siya sa iyang lovelife kon magkarelasyon na mo. Wa, Sheen. Pero gisugot gihapon nimo siya.” “Because of love, Dizza.” Nagpabilin kong nagtan-aw sa lawod. Morag di ko makatan-aw og diretso kang Dizza. Best friend ko siya, childhood friend pa gyud. Kanunay siyang nagtambag nako nga likayan ko si Gerald ug di ko tagdon ang pagpangulitawo ani nako. Nakaila sab kaayo si Dizza kon unsa ka kapalikero si Gerald kay nagpuyo gud ming tulo sa Sogod. Nailhan si Gerald sa among lugar nga hilig sa pagduwa-duwa og babaye.

“Because of love? Huh! Di na kana uso karong panahona, uy, Sheen. Ang importante nga duna tay kalinaw ug komportable ta sa atong lovelife. Unsa man, nasayop ba ko sa akong giingon nimo nga kon sugton mo si Gerald mag-antos ka lang niya?”

Wa ko motubag. Miduko ko. Nauwaw ko kang Dizza kay wa ko maminaw sa iyang mga tambag. Nagtuman gyud ko sa akong gusto kay giagad ko ang pinitik sa akong kasingkasing. Dunay karibal si Gerald nako, si Greg. Buotan si Greg ug gikan sa maayong pamilya. Mas guwapo pa gani siya kang Gerald.

Apan si Gerald ang akong love. Aw, siya gyud ang akong sugton.

Apan wa nay kapuslanan kon magbasol man ko karon. Wa na sab mangulitawo si Greg nako. Tingali, duna na siyay girlfriend karon. Si Greg ang nagustohan ni Dizza para nako.

“Pagtulon-an na kini nimo, Sheen.”

Nagpahiyom na si Dizza nako. Morag gusto niya nga dasigon ko. (SUMPAYAN)