Mga kawatan

Wala mahimutang si Antolin dihang nahuman na siya’g kawot sa yuta ilawom sa punoan sa nangka luyo sa ilang balay. Puwerte niyang pungota kay wa na niya makita didto ang tulo ka android cellphone nga iyang nalabni sa nangaging mga adlaw. Gisulod niya kini sa usa ka plastic canister ug gilubong duol sa punoan sa nangka usa ka gabii sa miaging semana, isip pagpalabay sa panahon kon dunay pulis nga mosukna kaniya kay may biktima nga mo-reklamo. Ilado man god siya nga esnatser sa ilang sityo sa Lisap. Wa niya tagoi sud sa ilang balay ang maong mga butang kay basi’g magdala og search warrant ang pulis ug makit-an kini.

“Pesteng yawa! May nangawat sa akong butang!” naminti si Antolin nga mihansak sa bara nga iyang gigunitan sa plastic canister nga mao na lay nahibilin didto sa ilawom sa lungag.

Naagian siya ni Solomon nga naghakot og tubig gikan sa ka-Ambrosio nga namaligya’g tubig. Silingan ni Antolin si Solomon kansang balay duol ra kaayo sa balay ni Antolin.

“Maayong buntag, Pre!” timbaya ni Solomon nga mibutang sa gibiking niyang balde sa yuta.

“Di maayo ang buntag, Pre! May nanghilabot sa akong gitagoang butang diri!” ni Antolin nga mitan-aw kang Solomon.

“Unsang butanga, Pre?” “Pre, ato ra ni. Paltik nga rebolber nga gipa-deyl nako sa amigo kong taga Danao,” pamakak ni Antolin.

LAMBERTO G. CEBALLOS Cawayan, Dalaguete, Cebu

“Kuyawa ana, Pre! Kon sakpan ka, segurado gyod preso ka.”

“Lagi. Pero wa man tay laing panginabuhian, payits na lang!”

“Unya, Pre, unsaon man nimo pagpasabot ang amigo mong taga Danao?” ni Solomon.

Gitutokan ni Antolin si Solomon ug namulong og bakak, “Ako lang hangyoon, Pre, nga data-datahan ko lang hangtod maimpas ang kantidad nga iyang gisitar.”

“Morag mao ra nay paagi, Pre,” ni Solomon.

“Basta, Pre, kon mahibaw-an ko unya kon kinsa ang nagkawat adto, di ko siya binlan og gininhawa!” ni Antolin nga naghunahuna sa tulo ka selpon nga android. Iyang banabana mokantidad ang tanan og saysinta mil pesos (sa tag P20,000 kada usa) kay Popo ang brand.

“A-Angay gyod, P-Pre,” ni Solomon dayong bitbit sa balde. “Biyaan usa tika kay maglung-ag pa ko.” Nagkuba-kuba ang iyang dughan nga nahinumdom sa usa ka gabii kanus-a nakita niya si Antolin nga nagkawot og lungag ilawom sa punoan sa nangka.

Niadtong gabhiona didto si Solomon sa ilang kasilyas nga kasikbit da sa ilang kusina. May kasikas nga iyang nabati sa luyo sa balay nilang Antolin. Milili siya sa gihang sa bungbong sa kasilyas ug nakita niya si Antolin nga may gilubong sa yuta. Ug sa miaging semana nahibaw-an niya nga si Antolin miadto sa usa ka dakong lungsod sa Negros Oriental kay namista, Mao nga usa ka lawom nga gabii gikawot ni Solomon ang dapit diin gilubong ni Antolin ang plastic canister nga gisudlan sa tulo ka selpon nga android. Iya dayong gi-deyl ang mga selpon sa kumprador og mga kinawat sa ilang sityo. Nahalin og trayinta mil pesos ang tulo. ‘Gordo!’ nakatuaw si Solomon.

USA ka buntag samtang nanglawog si Solomon sa iyang binuhing mga baboy nabati niya ang balita sa radyo nga nadakpan si Antolin sa pulis sa Dumaguete nga ‘misalisi’ sa bag sa usa ka babaye diha sa Rizal Blvd samtang nag-zumba uban sa iyang mga higala. Sa iyang bahin nawala ang iyang kakulba sa iyang pagkawat sa mga selpon ni Antolin. Wa man say nasayod sa ilang mga silingan nga siya maoy nagkawat. Mipahiyom si Solomon nga nahinumdom sa mga pulong ni Senyor Don Policarpio, iyang agalon nga mestiso Katsila sa batan-on pa siya ug didto pa siya magpuyo sa Bacolod isip mutsatso sa asyenda ni Don Policarpio. “El que robo al ladron tiene cien anios de perdon.” Sa Binisaya pa, ‘Kinsa kadtong mokawat sa butang nga kinawat sa usa ka kawatan, pasayloon siya og sa usa ka gatos ka tuig.” (KATAPUSAN)