Inahan miabandonar sa kaugalingong anak

Dear Atty. Joan,

Maayong buntag. Ako diay si Daniel ug mangayo unta ko ug tambag kabahin sa akong kapuyo sauna. Naa miy usa ka anak ug tungod sa among kahimtang, napugos siya ug trabaho ug didto siya naka relasyon ug lalaki na maayog kahimtang. Naabot gyud sa punto nga gibiyaan mi niya sa iyang anak.

Na antos nako ug sa akong anak ang lima ka tuig nga wala siya. Karun nga unom na ka tuig akong anak, nibalik siya ug gustong kuhaon ang bata ug mao kini akong suliran karon. Ni ingon siya nga matud sa balaod wala koy katungod gyud, tambagi ko palihug. Daniel Daniel,

Ang atong balaud nag ingon nga walay bata nga nagpangidaron ug sais anyos pa ubos ang mahibulag sa iyang mama, apan dili kini sa tanang higayon kay pwedi maka desisyon ang korte nga ihibulag ang bata sa mama kung adunay igong makapugsanong rason.

Ang makapugsanong rason susama sa walay pag pagpakabana, pag abandon sa bata, walay trabaho ug imoralidad, pirming pag hubog-hubog, drug adik, pagmaltrato sa bata, pagkabuang ug sakit nga maka takod sa bata.

Sa imohang sitwasyon, pwedi maka desisyon ang korte nga ihibulag ang bata sa iyang mama sa makapugsanong rason nga pag abandon niini ug dili kapugos ang imong kapuyo sauna sa pag kuha sa inyung anak.

Apan ang atong balaud pirming nag huna-huna sa kung unsa may pinaka-maayo para sa interest sa bata. Mas maayong magkasinabot nalang mo sa imong saunang kapuyo haron dili pud lo-uy ang bata nga mag dako nga walay gi ilang mama.

Hinaot magkasinabot mo sa imong saunang kapuyo para sa kaayuhan sa bata. Atty. Joan

Pahibalo: Kini opinyon lamang nga nagbase sa inyong lakbit-saysay ug kini pwede nga mausab sa dugang pa nga mapatin-awa ang detalye. Kon adunay pa kamoy mga pangutana nga adunay kalabutan sa katungod sa mga bata, mahimong mo-message sa Fcebook account sa CLB