MGA HIGANTE MAGKOMBATI
Human sa siyam ka mga tuig, mahitabo na ang dugay’ng giatangan nga panag-engkuwentro og balik sa Sugbuanong mga higante nga sila si JuneMar Fajardo ug Greg Slaughter sa usa ka championship series.
Nahimo kining posible human gipalagpot ni Slaughter ug sa Brgy. Ginebra Gin Kings ang Rain or Shine Elasto Painters pinaagi sa 96-94 nga kadaugan sa Game 4 nga maoy nagtiklop sa ilang semi-finals best-of-5 series, 3-1, sa PBA Commissioner’s Cup sa miaging gabii.
Sa kadaugan, naangkon sa Gin Kings ang katungod sa pagpakigbatok sa puwersa ni Fajardo nga mao ang defending champions San Miguil Beermen alang sa championship best-of-7 series nga sugdan karong Biyernes.
Alang kang Slaughter, ang ilang panagtagbo og balik ni Fajardo sa finals nakapabuhi og balik sa ilang gikahinamang panagribal sa college basketball sa Sugbo.
Si 7-footer Slaughter, kinsa usa ka Fil-Am gikan sa Cleveland, Ohio, produkto sa University of the Visayas (UV) Green Lancers.
Samtang si 6’10” Fajardo, kinsa lumad nga taga lungsod sa Pinamungajan, Cebu, produkto sa University of the Cebu (UC) Webmasters. “This is the first time we
square off in the finals, and so it brings back good memories of our home in Cebu, where we played and that’s where we’re both from,” matod ni Slaughter sa interbyu sa Spin.ph.
“We were young back then, 19, 18 year olds playing in the finals against each. Now we’ve come a long way and it’s exciting to do that again.”
Katapusang nag-abot sa finals series sila si Slaughter ug Fajardo niadtong 2009 Cebu Schools Athletic Foundation Inc (CESAFI) diin gilupig sa Green Lancers ang Webmasters.
Niadtong higayuna, nagbahin sila si Slaughter ug Fajardo sa MVP award.
Sa Cesafi, mas malampuson si Slaughter apan lahi ang sugilanon sa PBA diin giugbok ni Fajardo ang iyang dominasyon.
Sa PBA, si Fajardo nakapanag-iya og rekord nga unom ka Best Player of the Conference awards, rekord sab nga upat ka sunodsunod nga MVP awards, duha ka Finals MVP, ug unom ka mga kampiyunato.
Sa miaging duha ka seasons sa PBA, si Slaughter gihasol sa pagkaangol nga iyang nasinati apan taliwala niini, nakabira siya og tipik sa kalampusan.
Nakaangkon si Slaughter og duha ka mga titulo ug napili siyang Best Player of the Conference sa Governor’s Cup sa miaging tuig.
“It’s just good to be able to face off on the largest stage, which is the finals, where all the marbles count. I’m looking forward to it,” dugang ni Slaughter.
Ang Beermen ug Gin Kings nagtagbo sa finals niadtong 2017 Philippine Cup apan niadtong higayuna, wala nakaduwa si Slaughter gumikan kay aduna kini angol.
Gawas nila ni Fajardo, giatangan sab sa umaabot nga finals series ang panagparang sa duha ka eksplosibong imports nga sila si Justine Bronwlee sa Ginebra ug Renaldo Balkman sa San Miguel.
Ang duha magkauban kanhi sa Alab Pilipinas sa Asean Basketball League (ABL)./