NAPATAY SA CARMEN POLICE NASAYPAN RA?
Pipila ka mga sakop sa Carmen Police Station gireklamo ngadto sa National Bureau of Investigation (NBI) 7 tungod sa giingong pagkamatay sa usa ka subject sa ilang operasyon nga di diay mao kun mistaken identity lang.
Apan ang hepe sa kapulisan nanalipod sa iyang mga tawo ug mohangop sa bisan unsa nga imbestigasyon.
Gikompirmar ni NBI 7 Regional Director Patricio Bernales nga nidangop sa ilang buhatan ang mga kabanay sa namatay nga biktima.
Dungan sa gipahigayon nga One Time Big Time Operation sa Police Regional Office (PRO) 7 ug sa mga lokal nga kapulisan tibuok probinsiya sa Sugbo niadtong Hulyo 18, gipahigayon sa Carmen police ang ilang operasyon batok sa giilang si Joseph Taoy.
Ngan sa mga kabanay gipugngan ning mantalaan nunot sa ilang hangyo.
Sigun sa mga kabanay, nga pag-abot sa mga pulis, gipangutana niini ang biktima kon siya ba si Joseph Taoy nga maoy subject sa ilang operasyon.
Nanghimakak ang biktima kay di siya mao si Joseph.
Bisan og niingon na ang biktima nga di siya mao si Joseph nga ilang gipangita, gitumbok sa kabanay nga gipatay gihapon kini sa mga pulis.
Base sa record sa PRO 7 atol sa ilang OTBT niadtong Hulyo 18, may usa ka Joseph Taoy ga gi-report ang Carmen police nga napatay kay nisukol sa mga operatiba.
Matod ni Bernales nga nagkuha na sila karon sa pamahayag sa mga saksi.
Gani niadto ang iyang mga sakop sa lungsod sa Carmen alang niini.
Lakip sa ilang susihon kon kinsa nga pulis ang nipahigayon sa operasyon aron mailhan ang mga responsable.
“Kato ra’ng sa operation. Nag-kuan (susi) pa ta og kinsa pay mogawas sa investigation,” niingon si Bernales.
Sigun ni Bernales, “mistaken identity” maoy reklamo sa pamilya sanglit dili man Joseph Taoy maoy ngalan sa ilang kabanay nga napatay sa police operation.
Apan si Chief Inspector Christian Torres, hepe sa kapulisan sa Carmen, niingon nga di mistaken identity ang hitabo.
Segurado sila nga ang napatay mao ang ilang target.
Iyang gipasabot nga si Joseph Taoy ug Raymart Kyamco Taoy usa ra.
Matod niya nga gi-validate kini nga impormasyon sa iyang mga sakop samtang wa pa gipahigayon ang operasyon.
Busa segurado sila nga di mistaken identity ang kaso.
Naa silay mga papelis nga magmatuod nga usa lang sila si Joseph ug Raymart.