Sugbo makabenipisyo kang Arroyo
Nagtuo si Gob. Hilario Davide III nga makabenepisyo ang Sugbo ug ang mga Sugbuanon sa paglingkod ni Kongresista Gloria Macapagal-Arroyo isip Speaker of the House.
Di hinuon manginlabot si Davide sa posibleng desisyon ni Arroyo labot sa pagpatuman sa dismissal order batok ni kanhi gobernador ug karon Kongresista Gwendolyn Garcia.
Nagtuo si Davide nga gaan ang buot ni Arroyo sa Sugbo tungod sa iyang landslide nga kadaugan dinhi pagka-presidente sa nasud niadtong 2004.
Ang amahan ni Davide nga si kanhi Supreme Court Chief Justice Hilario Davide, Jr., maoy nipahurar kang Arroyo sa wa pa nilingkod pagka-presidente, diri mismo sa Sugbo.
Tungod kay di na presidente ug kongresista nalang si GMA, posibleng duna nay kausaban sa pagtagad niini sa Sugbo apan gitumbok ni Davide nga makapabor gihapon niini ang mga Sugbuanong kongresista nga maoy nagdala sa tingog sa mga taga-Sugbo didto sa Kongreso.
Si GMA gipili nga Speaker of the House niadtong Lunes, diin kapin sa 180 ka mga magbabalaod ang nipaluyo kaniya.
Ilang gipalagpot si Davao del Norte Congressman Pantaleon Alvarez.
Ubos sa liderato ni Alvarez sa Kongreso, wa niini gipatuman ang dismissal order batok sa kaatbang ni Davide sa politika nga si Garcia.
Wa hinuoy interes si Davide nga manghilabot sa posibleng desisyon ni Arroyo labot sa posibleng pagpatuman sa dismissal,nga gimando sa Office of the Ombudsman.
Di igsapayan sa gobernador kon ipatuman man kini o dili sa Ubos Balay Balauranan.
Niadtong Lunes, si Garcia maoy ni-move alang sa pag-adjourn sa sesyon sa Kongreso, hinungdan nga wa matuki gilayon ang planong pag-ilis sa liderato sa Lower House.